Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 776 Hüküm no: 1012 Orijinal metin no: [120a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Matyos v. Kamri’nin bağını, Karabaş Mardiros v. Simaven’e sattığı Vilâyet-i Anadolu’da Eğin kazâsında Apçağa nâm karyeden olup mahmiye-i İstanbul’da Langa Bostanı kurbunda İnebey mahallesi sükkânından olan enserci Matyos v. Kamri nâm zimmî meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda Karabaş Mardiros v. Simaven nâm râhib ile mezbûr Mardiros’un li ebeveyn karındaşı Karabaş Kazar tarafından tasdîka vekîl olup bimâ hüve nehcü’s-sübût vekâleti sâbite olan diğer Matyos v. Simaven nâm Ermeni muvâcehesinde bi’t-tav‘i’s-sâf ikrâr ve i‘tirâf edip bey‘-i âti’z-zikrin sudûruna değin yedimde mülküm ve hakkım olup karye-i mezbûrda vâki‘ bir tarafdan Ahmed nâm kimesne bağı ve bir tarafdan Agya ve bir tarafdan Mekos nâm Ermeniler bağları ve bir tarafdan tarîk-i âm ile mahdûde Tahkürk? bağı demekle ma‘rûf bir kıt‘a mülk bağımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç yüz yirmi kıt‘a esedî guruşa mezbûr Karabaş Mardiros ile li ebeveyn karındaşı müvekkil-i merkūm Karabaş Kazar’a ale’l-iştirâki’s-seviy bey‘ edip anlar dahi vech-i muharrer üzre iştirâ ve kabûl eylediklerinden sonra semen-i mezbûr üç yüz yirmi esedî guruşun yüz altmış kıt‘a esedî guruşu merkūm Karabaş Mardiros yedinden ve yüz altmış kıt‘a esedî guruşunu dahi müvekkil-i mezbûr Karabaş Kazar yedinden tamâmen alıp kabz edip zikr olunan bir kıt‘a bağı mahallinde zabta mezbûr Karabaş Mardiros ile müvekkil-i mezbûr Karabaş Kazar’ı taslît eyledim dedikde mezbûr Karabaş Mardiros ile vekîl-i mezbûr diğer Matyos mukırr-ı mezbûr Matyos’u şifâhen tasdîk ve vicâhen tahkīk etmeğin mâ hüve’l-vâki‘ bi’t-taleb ketb olundu. Fî selhi Ramazâni’l-mübârek li sene seb‘a ve seb‘în ve elf. Şuhûdü’l-hâl: Ahmed Bey b. Ali, Mehmed Çelebi b. Abdullah, İbrahim Çelebi b. Ahmed, Hasan Çelebi b. Ahmed, Mehmed Bey b. Ramazan.