Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 837 Hüküm no: 629 Orijinal metin no: [142a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Şaban Çelebi’nin torunları için vasiyet ettiği paranın terekesinden vasiye teslim edilmesi Mahmiye-i Galata muzâfâtından kasaba-i Fındıklıˈda Yahya Çelebi mahallesinde sâkin olup işbu sene-i mübârekede tarîk-i hâcc-ı şerîfde vefât eden el-Hâc Şa‘bân Çelebi b. Mehmedˈin verâseti zevce-i metrûkesi Sayme bt. Abdullah ve sulbî kebîr oğulları Mehmed Çelebi ve Abdurrahim Çelebiˈye ve sulbî sagīr oğlu Osmanˈa münhasıra olduğu şer‘an [şer‘an] zâhir ve müte‘ayyin oldukdan sonra işbu râfi‘üˈr-rakīm merkūm Mehmed Çelebi sulbî kebîr oğlu Mustafa Çelebiˈnin vasîsi olan Mustafa Çelebi b. Ali mahzarında vekâleten velâyet üzerine da‘vâ ve takrîr-i kelâm edip babam müteveffâ-yı mezbûr hâcc-ı şerîfe gider oldukda huzûr-ı Müslimînˈde bi-emrillâhi te‘âlâ işbu sene tarîk-i hâcc-ı şerîfde vefât edersem mecmû‘ terekemden otuz esedî guruş oğlum oğlu mezbûr Mustafaˈya ve yirmi guruş kezâlik oğlum oğlu sagīr-i mezbûr İbrahimˈe verile deyü vasiyet ve ikrâr ve Müslimînˈi işhâd edip ve musırratan alâ-ikrârihî vefât etmekle hâlâ mezbûrun vasiyyeti mezbûr Mustafa Çelebiˈden vekâleten ve velâyeten taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden olup mahalle-i mezbûre sükkânından Mehmed Çelebi b. Ali ve Ali Çelebi b. Mehmed li-ecliˈş-şehâde meclis-i şer‘a hâzırân olup istişhâd olundukda fiˈl-vâki‘ müteveffâ-yı mezbûr Şa‘bân Çelebi işbu hâcc-ı şerîfe teveccüh ettikde bizim huzûrumuzda bi-emrillâhi te‘âlâ vefât edersem mecmû‘ terekemden oğlum işbu Mehmed Çelebiˈnin oğulları mezbûr Mustafaˈya otuz guruş ve İbrahimˈe yirmi guruş verile deyü vasiyyet ve ikrâr ve musırratan alâ ikrârihî vefât etmekle hâlâ müntakillân-ı mezbûrîni mezbûr Mehmed Çelebi içün hak ve taleb vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâdis-i aşer min-Cumâdelâhire li-sene hamse ve semânîn ve elf. Şuhûdüˈl-hâl: Mustafa b. Ali, Veli Çelebi b. Ali, Mehmed Çelebi b. Hasan, Ahmed Çelebi b. Osman, Latîf Çelebi b. Ali