Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 838 Hüküm no: 630 Orijinal metin no: [142a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye bt. Abdullah’ın, zümrüt satışından kocası merhum Yusuf’un zimmetindeki alacağını talep ettiği Mahmiye-i Galata muzâfâtından kasaba-i Kasımpaşaˈda Yeldeğirmeni mahallesinde sâkin iken bundan akdem vefât eden el-Hâc Yusuf b. Abdullahˈın verâseti zevce-i metrûkesi Safiye bt. Abdullah ile kebîr oğlu Mustafa Çelebiˈye ve sagīr oğulları Halil ve Abdullahˈa münhasıra olduğu şer‘an zâhir ve müte‘ayyin oldukdan sonra bâ‘isetüˈl-kitâb mezbûre Safiye meclis-i şer‘de oğlu Mustafa Çelebi mahzarında üzerine da‘vâ ve takrîr-i kelâm zevcim müteveffâ-yı mezbûr hayatında iki yüz otuz guruş kıymetli bir zümrüdlü bir çift küpemi âhara bey‘ edivermek içün vech-i muharrer üzere ol dahi kabz ve teslîm ve âhara semen-i mezbûra bey‘ ve kabz edip meblağ-ı mezbûru bana edâ etmeden vefât etmekle hâlâ meblağ-ı mezbûru muhallefâtından mezbûr Mustafaˈdan taleb ederim suâl olunsun dedikde [142b] gıbbeˈs-suâl ve akībeˈl-inkâr ve ba‘de talebiˈl-beyyine udûl-ı ricâlden Osman Çelebi b. Ahmed ve Receb Bey b. Habib nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ mezbûre Safiye zikrolunan küpesini iki yüz otuz guruşa âhara bey‘ ve kabz-ı semen etmekle hâlâ mezbûre Safiye içün meblağ-ı mezbûru tereke-i müteveffâ-yı mezbûrdan hakk-ı taleb vardır biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈl-yevmiˈl-hâmis-i aşer min-Cumâdelâhire li-sene hamse ve semânîn ve elf. Şuhûdüˈl-hâl: Mehmed Efendi b. Mustafa el-imâm, Hüseyin Halîfe el-müezzin, el-Hâc Mehmed b. Abdullah, Salih Çelebi b. Murad Kapudan, Mehmed Çelebi b. Hüseyin Kapudan, İsa Beşe b. Halil