Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 838 Hüküm no: 631 Orijinal metin no: [142b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf’un terekesinden varislere intikal eden arsa ve dükkânların borçların ödenmesi için vasî Mustafa Çelebi tarafından Safiye bt. Abdullah’a satıldığı Mahmiye-i Galata a‘mâlinden kasaba-i Kasımpaşaˈda Yeldeğirmeni mahallesinde sâkine iken bundan akdem vefât eden el-Hâc Yusuf b. Abdullahˈın verâseti zevce-i metrûkesi Safiye bt. Abdullah ile kebîr oğlu Mustafa ve sagīr oğulları Halil ve Abdullahˈa münhasıra olduğu şer‘an zâhir ve müte‘ayyin oldukdan sonra müteveffâ-yı mezbûrun terekesine vâzi‘uˈl-yed olan oğlu mezbûr Mustafa Çelebi meclis-i şer‘de işbu râfi‘atüˈr-rakīm mezbûre Safiye mahzarında ikrâr ve takrîr-i kelâm edip müteveffâ-yı mezbûrun düyûnu terekesine müstağraka olmağla tereke-i menkūlü düyûnuna vefâ etmeyip akārı dahi bey‘ olunması lâzım gelmeğin mahalle-i mezbûrede vâki‘ bir tarafı Medîne-i Münevvere -şerrefehâllâhu te‘âlâ alâ-münevvirihâ- vakfı olup hâlâ verese tasarrufunda olan vakf menzile ve üç tarafı tarîk-i âmma müntehî tûlen sekiz ve arzen beş zirâ‘ bi-hesâb-ı terbî‘i kırk zirâ‘ arsa ve üzerinde mebnî iki dükkânı ve bir mikdâr arsayı müştemil mülkü dahi biˈl-izniˈş-şer‘î sûk-ı sultânîde beyneˈt-tâlibîn ba‘deˈn-nidâ veˈl-müzâyede dört bin akçede mezbûr Safiye üzerinde ve ziyâde ile tâlib-i âhar olmadığından mâ‘adâ meblağ-ı mezbûr arsa ve dükkânların semen-i misli olduğu sikāt haberiyle müte‘ayyin oldukdan sonra zarûret-i düyûn-ı mezbûre içün zikrolunan mülk arsa ve dükkânları meblağ-ı mezbûr dört bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile merkūme Safiyeˈye bey‘ ve teslîm ol dahi vech-i muharrer üzere iştirâ ve kabûl ve tesellüm ettikden sonra semeni olan meblağ-ı mezbûr dört bin akçeyi merkūme Safiyeˈnin kırk yedi bin altı yüz akçe hakk-ı müsbetinin dört bin akçesine takās edip ol dahi ba‘deˈl-mukāssa veˈl-kabûl sâlifüˈz-zikr arsa ve dükkânlar mezbûre Safiyeˈnin mülk-i müşterâsıdır hasbemâ’ yeşâ’ mutasarrıf olsun dedikde gıbbeˈt-tasdîkiˈş-şer‘î mâ vaka‘a biˈt-taleb ketb olundu. Fiˈl-hâmis-i aşer min-Cumâdelâhire li-sene hamse ve semânîn ve elf. Şuhûdüˈl-hâl: es-Sâbıkūn