Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 839 Hüküm no: 632 Orijinal metin no: [142b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin b. Abdullah’ın, merhum Mehmed Reis’in azatlı kölesi olduğu varislerin kölelik iddialarının reddedildiği İşbu orta boylu, açık kaşlı, elâ gözlü, Rusiyyüˈl-asl bâ‘isüˈl-vesîka Şahin b. Abdullah meclis-i şer‘-i şerîfde mahmiye-i Galata hâricinde Bedreddin Bey mahallesinde sâkin iken bundan akdem vefât eden Mehmed Reis b. Mustafa Bey verâseti zevce-i metrûkesi Fatma bt. Abdullah ile sulbiye kızları Hadîce ve Ümmi ve Havva nâm sagīrlere ve li-ebeveyn kız karındaşı ve Emine nâm hatuna münhasıra olduğu şer‘an zâhir ve müte‘ayyin oldukdan sonra mezbûre Mümine tarafından husûs-ı câ’iˈz-zikre vekîl olup zât-ı mezbûreyi ma‘rifet-i şer‘iye ile ârifân olan Süleyman Çelebi b. Mustafa ve Halil Çelebi b. Abdusselam şehâdetleriyle şer‘an vekâleti sâbite olan Ömer Ağa b. Ahmed ile sagīrân-ı mezkûrânın kıbel-i şer‘den mansûb vasîleri olan Musa Çelebi b. Ali mahzarlarında üzerlerine da‘vâ ve takrîr-i kelâm biz müteveffât-ı mezbûrun abd-i memlûkesi olup mülkünde olduğum hâlde hasbeten lillâh-i te‘âlâ beni mülkünden ihrâc edip tahrîr ve i‘tâk etmişdir hâlâ mezbûrlar beni rık olmak üzere tereke-i müteveffâ-yı mezbûre idhâl murâd ederler suâl olunup sebîlim tahliye olunması matlûbumdur dedikde gıbbeˈs-suâl veˈl-inkâr ve ba‘de talebiˈl-beyyine udûl-ı ricâlden el-Hâc Abdi Çelebi b. Hasan ve Mehmed Çelebi b. Bayram ve Abdusselam b. Halil li-ecliˈş-şehâde meclis-i şer‘a hâzırûn olup gıbbeˈl-istişhâd fiˈl-vâki‘ müteveffâ-yı mezbûr hayatında târih-i kitâbdan dört sene mukaddem huzûrumuzda abd-i memlûk-ı mezbûre Şâhinˈi hasbeten lillâh-i te‘âlâ mülkünden ihrâç edip ve tahrîr ve i‘tâk eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle mezbûr Şahinˈin ı‘tkına ba‘deˈl-hükm mâ vaka‘a biˈt-taleb ketb olundu. Fiˈs-sâlis veˈl-ışrîn min-Cumâdelâhire li-sene hamse ve semânîn ve elf. Şuhûdüˈl-hâl: Mehmed Odabaşı b. Ahmed, Hüseyin Çelebi b. Mehmed, Mahmud Çelebi b. el-Hâc Mustafa, Mehmed b. Mustafa, Halil Çelebi b. Abdusselam, Mustafa Yazıcı b. Mehmed, Hasan Beşe b. Muslı