Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 69 Hüküm no: 34 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Patrik Yovaniko’nun Haseki İdris Ağa’ya borcu olduğu Husûs-ı âti’z-zikrin mahallinde tahrîri iltimâs olmağın küttâb-ı mahkemeden mevlânâ Mehmed Efendi el-Hâc Mustafa el-Kādı irsâl olunup ol dahi zeyl-i kitâbda isimleri mastûr olan Müslimîn ile işbu bâ‘isü’l-kitâb umdetü’l-emâsil ve’l-ekârim Haseki İdris Ağa’nın tasdîk-i âti’l-beyâna sâbitü’l-vekâle vekîli olan Başeski İbrahim Ağa b. Hasan’ın mahmiye-i İstanbul’da Davudpaşa Mahallesi’nde sâkin olduğu menzile varıp akd-i meclis-i şer‘-i şerîf olundukda kefere tâifesinin hâlâ patrikleri olan Yovaniko v. Manol meclis-i mezbûrda vekîl-i mezbûr Başeski İbrahim Ağa muvâcehesinde bi’t-tav‘i’s-sâf ikrâr u i‘tirâf edip müvekkil-i mezbûr İdris Ağa’ya cihet-i deyn-i şer‘îden bin riyâlî guruş ve levn ve zirâ‘ı beynimizde ma‘lûm çuka bahâsından dahi üç yüz guruş ki cem‘an bin üç yüz guruş târîh-i kitâbdan iki yüz gün tamamına müeccel ve mev‘ûd zimmetimde lâzımü’l-edâ deynim vardır dedikde gıbbe’t-tasdîkı’ş-şer‘î Gavril v. Yorgi ve Ereğli metropolidi Nikola v. Manol ve Kapıdağı metropolidi Anayos v. Argopril ve İznikmid metropolidi Kolos v. Mihal ve Ballıbadra metropolidi Danil v. Resbol nâm zimmîler her biri kefîl bi’l-mâl olmağın mâ-vaka‘a bi’t-taleb ketb olunduğunu mevlânâ-yı mezbûr mahallinde tahrîr ve ba‘dehû meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâlis min-Şa‘bâni’l-mu‘azzam li-sene selâse ve sittin ve elf. Şuhûdü’l-hâl: Habib Ağa b. Hasan, Ali Ağa b. Hüseyin, Hasan Çelebi [b.] Münir, Ali Bey b. Mehmed, Mehmed b. Süleyman Çukadâr.