Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 777 Hüküm no: 1013 Orijinal metin no: [120a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice Hanım bt. Mehmed Bey’in, çiftliğini, bağını ve tarlalarının tasarruf hakkını Yusuf Çelebi b. Ahmed’e devrettiği Husûs-ı âti’l-beyânın mahallinde tahrîri iltimâs olunmağın kıbel-i şer‘den mevlânâ Mehmed Efendi b. Abdülbâkī umdetü’l-emâsil ve’l-akrân Atâullah Ağa b. Bekir mahmiye-i İstanbul’da İshak Paşa mahallesinde sâkin olduğu menziline varıp zeyl-i rakīmde mektûbü’l-esâmî olan müslimîn huzûrunda akd-i meclis-i şer‘-i hatîr-i lâzımü’t-tevkīrde mahalle-i mezbûrda sâkine Hatice Hanım bt. Mehmed Bey tarafından husûs-ı âti’l-beyâna vekîl olduğu mezbûrenin zâtını ma‘rifet-i şer‘iyye ile ârifân olan Ali Bey b. Rıdvan ve Bayram b. Abdullah nâm kimesneler şehâdetleriyle şer‘an vekâleti sâbite olan mûmâ-ileyh Atâullah Ağa meclis-i ma‘kūd-ı mezbûrda bâ‘isü’l-kitâb Yusuf Çelebi b. Ahmed mahzarında bi’l-vekâle ikrâr ve takrîr-i kelâm edip müvekkilem mezbûre Hatice Hanım Havâss-ı Refî‘a müzâfâtından Küçük Çekmece nâhiyesine tâbi‘ Alibey nâm karyede vâki‘ etrâf-ı erba‘ası tarîk-i âm ile mahdûd muhavvataynı muhtevî olup muhavvata-i hâriciyyesi bir bâb fevkānî oda ve bir şehnişînli sofa ve dehliz ve beş göz anbar ve bir ahır ve iki kenîfi muhtevî ve muhavvata-i dâhiliyyesi üç beyt-i süflî ve bir matbahı ve iki ağızlı fırını ve bir buzağı ahırı ve bir inek ahırı ve bir tavuk kümesini müştemil çiftlik ta‘bîr olunur mülk menzilini ve yine cevânib-i erba‘ası taş duvar bir kıt‘a mülk bahçesini ve bir saman damını ve yine menzil-i mezbûr kurbunda vâki‘ lede’l-ahâlî ve’l-cîrân ma‘lûmü’l-hudûd bir kıt‘a mülk bağını cümle hukūk ve merâfıkı ile bi safkatin vâhidetin merkūm Yusuf Çelebi’ye kırk üç bin fıddî-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra yine müvekkile-i mezbûre Hatice taht-ı tasarrufunda olup çiftlik-i mezbûre intimâ ile tahdîd [ve] tavsîfden müstağnî tahmînen iki yüz keyl tohum isti‘âb eder yirmi kıt‘a tarlasının dahi hakk-ı tasarrufunu sâhib-i arz ma‘rifeti ile on dört bin akçe bedel mukābelesinde merkūm Yusuf Çelebi’ye ferâğ ve tefvîz ol dahi tefevvuz ve kabûl edip semen-i mezkûr kırk üç bin akçe ile bedel-i mezkûr on dört bin akçe ki cem‘an elli yedi bin akçeyi müvekkile-i mezbûre Hatice Hanım merkūm Yusuf Çelebi yedinden tamâmen alıp kabz eyledi ba‘de’l-yevm emlâk-i mezbûra mülk-i müşterâsı ve arâzi-i mezkûre hakk-ı müfevvazı olmuşdur [120b] müvekkile-i mezbûrenin alâka ve medhali kalmamışdır dedikde gıbbe’t-tasdîk vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Abdi b. Mehmed ile meclis-i şer‘a gelip alâ vukū‘ihî inhâ ve ihbâr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şevvâli’l-mükerrem li sene seb‘a ve seb‘în ve elf. Şuhûdü’l-hâl: İlyas Ağa b. Ali, Hasan Ağa b. Abdullah, Şeyh Mehmed b. Abdullah, Osman Çelebi b. Abdullah, Ali Bey b. Rıdvan, Osman Bey [b.] İbrahim.