Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 847 Hüküm no: 638 Orijinal metin no: [144a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Himmetdayı b. Mehmed’in, merhum Mehmed Reis’in zimmetindeki pirinç bahasından alacağını varislerden talep ettiği Mellâh tâifesinden işbu sahibüˈl-kitâb Himmetdayı b. Mehmed meclis-i şer‘-i şerîfde mahmiye-i Galata hâricinde Bedreddin Bey mahallesinde iken vefât eden Mehmed Reis b. Mustafaˈnın verâseti zevce-i metrûkesi Fatma bt. Abdullah ile sulbiye sagīre kızı Hadîce ve Havva ve Emineˈye ve li-ebeveyn kız karındaşı Mümineˈye münhasıra olduğu şer‘an zâhir ve müte‘ayyin oldukdan sonra sagīrân-ı mezbûrânın kıbel-i şer‘den mansûb vasîleri olmağla tereke-i müteveffâ-yı mezbûre biˈl-vesâye vâzi‘uˈl-yed olan Musa Çelebi b. Ali mahzarında üzerine da‘vâ ve takrîr-i kelâm edip müteveffâ-yı mezbûr zimmetinde vesâyetden vekîli beynimizde ma‘lûm pirinç bahâsından otuz beş esedî guruş hakkım olup meblağ-ı mezbûru kableˈl-ahz fevt olup hâl-i hayatında meblağ-ı mezbûr bana deyni olduğunu huzûr-ı Müslimînˈden ifrâz ve bizi işhâd dahi etmekle hâlâ taleb ederim vasî-i mezbûra suâl olunsun dedikde gıbbeˈs-suâl veˈl-inkâr ve isre-talebiˈl-beyyine udûl-ı Müslimînˈden Kerasteci Mehmed Beşe b. Hüseyin ve Mustafa Yazıcı b. ( ) nâm kimesneler li-ecliˈş-şehâde meclis-i şer‘a hâzırân olup gıbbeˈl-istişhâd fiˈl-vâki‘ müteveffâ-yı mezbûr hayatında deyn-i mezbûre bâlâya tahrîr olunduğu üzere otuz esedî guruş zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyetihî şerâ’itiˈl-kabûl şehâdetleri makbûle oldukdan sonra müdde‘î-i mezbûr Himmetdayı ba‘deˈt-tahlîf mûcebiyle hüküm birle mâ-vaka‘a biˈt-taleb ketb olundu. Fiˈs-sâlis veˈl-işrîn min-Cumâdelâhire li-sene hamse ve semânîn ve elf. Şuhûdüˈl-hâl: Ömer Efendi b. Ali, Hasan Çelebi b. İshak, Hüseyin Çelebi b. Ali, İsa Beşe b. Halil, Ahmed b. Osman, Veli Çelebi Ali, Mehmed b. Ali