Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 847 Hüküm no: 639 Orijinal metin no: [144a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Abdullah’ın, kocası merhum Mehmed Reis’in zimmetindeki mehir alacağını vasî Musa Çelebi’den talep ettiği Mahmiye-i Galata hâricinde Bedreddin Bey mahallesinde sâkin iken bundan akdem vefât eden Mehmed Reis b. Mustafaˈnın verâseti zevce-i metrûkesi Fatma bt. Abdullah ile sulbiye sagīre kızları Hadîce ve Havva ve Emineˈye ve li-ebeveyn kız karındaşı Mümine nâm hatuna münhasıra olduğu şer‘an zâhir ve müte‘ayyin oldukdan sonra işbu bâ‘isetüˈl-vesîka Fatma meclis-i şer‘-i hatîrde sagīrât-ı mezbûrâtın tesviye-i emirlerine kıbel-i şer‘den mansûb vasîleri olmağla tereke-i müteveffâ-yı mezbûre biˈl-vesâye vâzi‘uˈl-yed olan Musa Çelebi b. ( ) mahzarında üzerine da‘vâ ve takrîr-i kelâm edip zevcem müteveffât-ı mezbûrun zimmetinde ma‘kūdun-aleyh olan beş bin akçe mehr-i müeccelimi kableˈl-istifâ fevt olup hâl-i hayatında meblağ-ı merkūm bana deyni olduğunu alâ-ruûsiˈl-işhâd ikrâr ve işhâd dahi etmişdi hâlâ terekesinden taleb ederim vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı ricâlden Süleyman Çelebi b. Mustafa ve Abdusselam b. Halil li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hayatında zevcem Fatmaˈnın beş bin akçe mehr-i müecceli zimmetimde deynimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘iyye-i mezbûre aleˈl-vechiˈl-meşrû‘ tahlîfden sonra mûcebiyle ba‘deˈl-hükm mâ vaka‘a biˈt-taleb ketb olundu. Fiˈl-yevmiˈs-sâlis veˈl-işrîn min-Cumâdelâhire li-sene hamse ve semânîn ve elf. Şuhûdüˈl-hâl: Halil Çelebi b. Abdusselam, Ömer Efendi b. Ali, Hasan Çelebi b. İshak, Hüseyin Çelebi b. Ali, Ahmed b. Osman, Veli b. Ali, Mehmed b. Hasan, İsa Beşe b. Halil