Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 858 Hüküm no: 649 Orijinal metin no: [145b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya b. Ahmed’in, merhum Mehmed Reis zimmetindeki odun bahasından alacağını vasî Musa Çelebi’den talep ettiği İşbu râfi‘üˈr-rakīm Yahya b. Ahmed meclis-i şer‘de mahmiye-i Galata hâricinde Bedreddin Bey mahallesinde sâkin iken bundan akdem vefât eden Mehmed Reis b. Mustafaˈnın sagīre kızları Hadîce ve Havva ve Ümmüˈnün tesviye-i emirlerine kıbel-i şer‘den mansûb vasîleri olmağla tereke-i müteveffâ-yı mezbûre vâzi‘uˈl-yed olan Musa Çelebi b. Ali mahzarında üzerine da‘vâ ve takrîr-i kelâm müteveffâ-yı mezbûr zimmetinde yedimden müşterâ ve makbûz her arabası kırk ikişer akçeden bin altı yüz seksen akçeye olmak üzere kırk araba odun bahâsından hakkım olup meblağ-ı mezbûru kableˈl-ahz fevt olup hâl-i hayatında meblağ-ı mezbûr bana deyni olduğunu huzûr-ı Müslimînˈde ikrâr ve işhâd dahi etmekle hâlâ vasî-i mezbûrdan taleb ederim suâl olunsun dedikde gıbbeˈs-suâl veˈl-inkâr ve ba‘de talebiˈl-beyyine udûl-ı Müslimînˈden Hasan b. Mehmed ve Mustafa b. İbrahim li-ecliˈş-şehâde meclis-i şer‘a hâzırân olup isreˈl-istişhâd fiˈl-vâki‘ müteveffâ-yı mezbûr hayatında müdde‘î-i mezbûr Yahyaˈya vech-i muharrer üzere odun bahâsından meblağ-ı mezbûr bin altı yüz seksen akçe zimmetimde deynim vardır deyü bizim huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra müdde‘î-i mezbûr ba‘deˈt-tahlîf mûcebiyle hüküm birle mâ vaka‘a biˈt-taleb ketb olundu. Fiˈs-sâdis veˈl-işrîn min-Cumâdelâhire li-sene [10]85 Şuhûdüˈl-hâl: Ömer Efendi b. Ali, Hasan Çelebi b. İshak, İsa Bey b. Halil, Hüseyin Çelebi b. Ali, Ahmed b. Osman