Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 859 Hüküm no: 650 Orijinal metin no: [145b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Fatma bt. Halil Ağa’nın, ölmeden önce terekesinden techiz, tekfin, hayır, hasenat ve diğer masraflarına harcanması için İsmail Çelebi’yi vasî tayin eylediği Mahmiye-i Galataˈya tâbi‘ kasaba-i Tophâneˈde Cihangir mahallesinde sâkine iken bundan akdem vefât eden Fatma bt. Halil Ağaˈnın verâseti sulbiye-i kebîre kızı Hadîce ile sagīre kızı Âişeˈye münhasıra olduğu şer‘an zâhir ve müte‘ayyin oldukdan sonra işbu bâ‘isüˈl-vesîka el-Hâc İsmail Çelebi b. el-Hâc Rıdvan meclis-i şer‘de sagīre-i mezbûrenin tesviye-i emrine kıbel-i şer‘den mansûb vasîsi olan Ebûbekir b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûre hâl-i marazında bi-emrillâhi te‘âlâ vefât ettiğimden [146a] sonra cümle muhallefâtından otuz beş miskāl bir çift altın bileziğimi techîz ve tekfînime ve ıskāt-ı salâtıma ve eyyâm-ı mu‘tâdede tabh-ı ta‘âm olunup it‘âm-ı fukarâ-yı Müslimîn oluna deyü huzûr-ı Müslimînˈde vasiyet ve ikrâr ve Müslimîni işhâd ve tenfîzine vasî-i muhtâr nasb ve ta‘yîn ve ben dahi ba‘de kabûliˈl-vesâye mezbûre Fatma musırraten alâ-ikrârihâ vefât etmekle hâlâ müteveffât-ı mezbûrenin terekesinden biˈl-vesâye vasî-i mezbûrdan taleb ederim suâl olunsun dedikde gıbbeˈs-suâl ve akībeˈl-inkâr vasî-i mezbûr cevâbında müteveffât-ı mezbûrenin terekesine vaz‘-ı yedini ikrâr lâkin vesâyet-i mezbûreyi inkâr edicek mezbûr el-Hâc İsmail Çelebiˈden müdde‘âsını müsbite beyyine taleb olundukda udûl-ı ricâlden Mustafa Çelebi b. Ali ve Eyüb Çelebi b. Enbiyâ nâm kimesneler li-ecliˈş-şehâde meclis-i şer‘a hâzırân olup isreˈl-işhâd fiˈl-hakīka müteveffât-ı mezbûre hâl-i marazında bi-emrillâhi te‘âlâ vefâtımdan sonra terekemden otuz beş miskāl bir çift altın bileziğimi techîz ve tekfînime eyyâm-ı mu‘tâdede tabh-ı ta‘âm ve it‘âm-ı fukarâ-yı Müslimîn oluna deyü bizim huzûrumuzda vasiyet ve ikrâr ve tenfîzine mezbûr el-Hâc İsmail Çelebiˈyi vasî-i muhtâr nasb ve ta‘yîn ol dahi ba‘deˈl-kabûl musırraten alâ-ikrârihâ vefât eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde isre-ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fî-selh-i Cumâdelâhire li-sene hamse ve semânîn ve elf. Şuhûdüˈl-hâl: es-Seyyid Osman Çelebi b. Abdülcelil, Ömer Çelebi b. el-Hâc Mustafa, Ali Çelebi b. ( ), Abdullah Çelebi b. ( ), Ahmed Beşe b. Osman