Galata Mahkemesi 114 Numaralı Sicil (H. 1083-1085 / M. 1672-1674) cilt: 54, sayfa: 860 Hüküm no: 651 Orijinal metin no: [146a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah’ın, merhum Mehmed Reis ortağı olduğu ve vasî Musa Çelebi’nin dörtte bir kayık hisselerine müdâhalesinin engellenmesini talep ettiği İşbu bâ‘isüˈl-vesîka Balıkçı tâifesinden Yusuf b. Abdullah meclis-i şer‘-i hatîrde mahmiye-i Galata hâricinde vâki‘ Bedreddin Bey mahallesinde sâkin iken bundan akdem vefât [eden] Mehmed Reis b. Mustafaˈnın verâseti zevce-i metrûkesi Fatma bt. Abdullah ile sulbiye kızları Hadîce ve Havva ve Ümmü nâm sagīrelere ve li-ebeveyn kız karındaşı Mümine nâm hatuna münhasıra olduğu şer‘an zâhir ve müte‘ayyin oldukdan sonra sagīrât-ı mezkûrenin tesviye-i emirlerine kıbel-i şer‘den mansûb vasîleri olup tereke-i müteveffâ-yı mezbûre biˈl-vesâye vâzi‘uˈl-yed olan Musa Çelebi b. Ali mahzarında üzerine da‘vâ ve takrîr-i kelâm edip bundan akdem müteveffâ-yı mezbûr eşyâ-i memlûkesinden olup kebîr balık kayığı ve ana tâbi‘ sıravakte? ta‘bîr olunur bir sagīr kayık ve on iki kayığa tâbi‘ balık sayd olunacak ağrib ta‘bîr olunur boyaları ve kurşunları ile bir kebîr ağ ve bir bakraç ve bir tâbe vesâir âlât-ı lâzıme-i mevcûdesinin rub‘unu bundan akdem müteveffâ-yı mezbûr bana sekiz bin beş yüz akçeye bâtten bey‘ ve teslîm ve ben dahi ba‘deˈl-iştirâ veˈt-tesellüm ve def‘üˈs-semen zikrolunan kayıkların ve ağrebin vesâir âlât-ı lâzıme-i mevcûdesinin rub‘unu benim ve sülüs-ı erbâ‘ı kendinin mülkü olmak üzere huzûr-ı Müslimînˈde akd-i şirket ettiğimizden sonra târih-i kitâba gelince müteveffâ-yı mezbûr ile vech-i meşrûh üzere aleˈl-iştirâk mutasarrıflar iken hâlâ vasî-i mezbûr Musa Çelebi zikrolunan rub‘ hissemi tereke-i müteveffâ-yı mezbûrdan olmak üzere bî-vech-i ta‘arruz almışdır suâl olunup men‘ olunması matlûbumdur dedikde gıbbeˈs-suâl veˈl-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînˈden es-Seyyid Mehmed Çelebi b. es-Seyyid Mustafa ve Yusuf Çelebi b. Abdullah ve Şahin b. Abdullah nâm kimesneler li-ecliˈş-şehâde meclis-i şer‘a hâzırân olup isreˈl-istişhâd fiˈl-hakīka müteveffâ-yı mezbûr hayatında vech-i muharrer üzere eşyâ-i memlûkemden olup zikirleri sebk eden kayıklar ve ağrib vesâir âlât-ı lâzıme-i mevcûde mezkûre mezbûr Yusufˈun mülk-i müşterâsı olup minvâl-i muharrer üzere şerîkimdir deyü huzûrumuzda ikrâr ve bizi işhâd eyledi biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’itiˈl-kabûl şehâdetleri makbûle oldukdan sonra mûcebiyle ba‘deˈl-hükm mâ vaka‘a biˈt-taleb ketb olundu. Fî-selh-i Cumâdelâhire li-sene hamse ve semânîn ve elf. Şuhûdüˈl-hâl: el-Hâc Mehmed İplikçi, Ömer Efendi b. Ali, Hasan Çelebi b. İshak, İsa Beşe, Hüseyin Çelebi b. Ali