Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 779 Hüküm no: 1015 Orijinal metin no: [120b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Avanos v. Mileş’in Ahanos v. Emircan’daki alacağının vasî Toros v. Haçik tarafından talep edildiği davada mühlet verildiği Enserci tâifesinden râfi‘ü’l-kitâb Toros v. Haçik nâm zimmî meclis-i şer‘-i şerîfde Ahanos v. Emircan nâm zimmî mahzarında üzerine da‘vâ ve takrîr-i kelâm edip vilâyet-i Anadolu’da Çüngüş kazâsına tâbi‘ Üveys nâm karye ahâlîsinden olup bundan akdem mahmiye-i İstanbul’da Çukurhamam kurbunda ensercilik eder iken hâlik olan Avanos v. Mileş nâm zimmî hayâtında yanında olan terekesini ve zimemde olan hukūkunu kabza ve düyûnunu edâya ve bâkīyi karye-i mezbûrda olan veresesine îsâle beni vasiyy-i muhtâr nasb ve ihtiyâr edip ve hâlik-i mezbûrun deyn-i şer‘îden mezbûr Ahanos zimmetinde doksan guruş hakkı olmağla suâl olunup vesâyetim hasebiyle meblağ-ı mezbûrun merkūm Ahanos’dan alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda tâife-i mezbûrdan Arakil v. Gasbar ve Taksan v. Safar nâm zimmîler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka hâlik-i mezbûr Avanos hayâtında yanında olan terekesini ve zimem-i nâsda olan hukūkunu ahz u kabza ve düyûnunu edâya ve bâkīyi karye-i mezbûrda olan veresesine îsâle müdde‘î-i mezbûru bizim huzûrumuzda vasiyy-i muhtâr nasb ve ihtiyâr edip ol dahi kabûl etmişidi biz bu husûsa bu vech üzre şâhidleriz şehâdet dahi eyleriz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup mûcebince müdde‘î-i mezbûrun vesâyetine hükm olundukdan sonra müdde‘î-i mezbûrdan deyn-i mezbûru da‘vâsı için beyyine taleb olundukda ityân-ı beyyine için istimhâl etmekle mehl-i şer‘î ile imhâl olunmağın mâ vaka‘a bi’t-taleb ketb olundu Fi’l-yevmi’s-sâmin ve’l-ışrîn min Ramazâni’l-mübârek li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Hasan Çelebi b. Ahmed, İbrahim Çelebi b. Ahmed, Veli Çelebi b. Mahmud, Hüseyin b. Ahmed.