Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 55 Hüküm no: 5 Orijinal metin no: [1b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Danil ile zevcesi Katerina bt. Mimar Vasil’in müşterek menzillerini Yakomi ve Praşkova’ya sattıkları Mahrûse-i Galata’da Bereketzâde mahallesinde sâkine Yorgi v. Danil nâm zimmî kendi tarafından asâleten ve zevcesi Katerina bt. Mimar Vasil v. Yani nâm zimmiye tarafından bey‘-i âti’l-beyânı ikrâra vekîli olduğu merkūmenin şahsını ma‘rifet-i şer‘iyye ile ârifân Dimitri v. Mosko ve Nikola v. Dimitri şehâdetleriyle şer‘an sâbit olmağla vekâleten mahfel-i şer‘-i hatîr-i lâzimü’t-tevkīrde kezâlik kendi tarafından asîl ve zevcesi Praşkova bt. Botino v. Yani tarafından ikrâr-ı câi’z-zikri tasdîka vekîl-i sâbitü’l-vekâlesi olan işbu hâmilü’r-rakīm Yakomi v. Todori nâm zimmî muvâcehesinde ve bi’l-asâle ve bi’l-vekâle ikrâr ve takrîr-i kelâm edip akd-i âtî sudûruna değin mahrûse-i Galata hâricinde Hüseyin Ağa mahallesinde vâki‘ bir tarafdan Sabuncuoğlu Yorgi menzili ve bir tarafdan Boyacı Yani menzili ve tarafeyni bahçe ve tarîk-i âm ile mahdûd fevkānî üç bâb oda ve dehlîz ve tahtânî bir bâb oda ve bir mahzen ve matbah ve kenîf ve bir mikdâr bahçeyi müştemil mülk menzilin nısf-ı şâyi‘i benim ve nısf-ı şâyi‘-i âharı zevcem merkūme Katerina’nın iştirâk-i seviyy üzere mülkümüz olmağın biz dahi menzil-i mahdûd-ı merkūmu cemî‘ tevâbi‘ ve levâhık ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcân-ı merkūmân Yakomi ve Praşkova’ya ale’l-iştirâki’s-seviy üç yüz otuz guruş ile mechûlü’l-aded bir kabza fülûsa bey‘ u temlîk ve teslîm eylediğimizde onlardan her biri dahi ber-vech-i muharrer iştirâken iştirâ ve temellük ve tesellüm ve kabûl eylediklerinden sonra semeni olan meblağ-ı mezbûr üç yüz otuz guruş mechûlü’l-aded bir kabza fülûsu zevcân-ı merkūmân yedlerinden her birimiz bi-kadri’l-hısas alıp ve zikr olunan mechûlü’l-aded bir kabza fülûsu işbu meclis-i şer‘de izâ‘at ve itlâf eyledim fîmâ ba‘d menzil-i mahdûd-ı merkūm bi-cümleti mâ yeştemilehû ve yahvîhi zevcân-ı merkūmân Yakomi ve Praşkova’nın iştirâk-i seviyy üzere mülk-i müşterâları olmuşdur keyfe mâ yeşâ ve yahtâr mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Cumâdelâhire sene 1136. Şuhûdü’l-hâl: Demirci Mehmed b. Ahmed, Demirci Ahmed b. Yusuf, el-Hâc Mehmed b. Mustafa, Süleyman Efendi b. Osman, Molla İbrahim b. Hüseyin, Sırmakeş Mustafa, Ali b. Ahmed.