Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 56 Hüküm no: 6 Orijinal metin no: [1b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mahmud’un mudarebeye kefaletten es-Seyyid Mehmed Reis’e karşı olan davasının reddedildiği Mahrûse-i Galata a‘mâlinden kasaba-i Tophâne’de Kâtib Mustafa Çelebi mahallesinde sâkin Mehmed Çelebi b. Mahmud mahfil-i şer‘-i hatîr-i lâzimü’t-tevkīrde işbu râfi‘u’l-vesîka es-Seyyid Mehmed Reis b. es-Seyyid Ahmed mahzarında üzerine da‘vâ ve takrîr-i kelâm edip ben târih-i kitâbdan altı ay mukaddem sefîne reîslerinden gāib ani’l-beled el-Hâc İbadoğlu demeğle ma‘rûf Bekir Reis’e mâlımdan alâ-tarîki’l-mudârebe yüz guruş def‘ u teslîm edip ol dahi yedimden ahz u kabz eyledikden sonra mezbûr es-Seyyid Mehmed Reis meblağ-ı mezbûr yüz guruşa kefîl ve dāmin olmağın suâl olunup meblağ-ı mezbûru bi-hükmi’l-kefâle bana edâya tenbîh olunması murâdımdır deyü da‘vâ etmeğin müddde‘î-i mezbûrun takrîr-i meşrûhu üzere mâl-i mudârebeye kefâlet sahîh ve mu‘teber olmayıp ve mezbûr es-Seyyid Mehmed Reis’e suâl dahi teveccüh etmemeğin mûcebiyle müdde‘î-i mezbûr Mehmed Çelebi Reis merkūma bî-vech mu‘ârazadan men‘ birle mâ-hüve’l-vâkı‘ bi’l-ibtigā ketb oulndu. Fi’l-yevmi’s-sâdis aşer min Cumâdelâhire sene 1137. Şuhûdü’l-hâl: Halil Çelebi b. Mustafa, İbrahim b. Mustafa, Mehmed b. Ahmed, Süleyman b. Ahmed.