Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 57 Hüküm no: 7 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Bey b. Osman’ın arsasını es-Seyyid Ahmed Çelebi ile İstemihan bt. Abdullah’a sattığı Mahmiye-i İstanbul’da Hoca Kasım Gönani mahallesi ahâlîsinden Abdullah Bey b. Osman nâm kimesne meclis-i şer‘-i hatîr-i lâzimü’t-tevkīrde mahrûse-i Galata muzâfâtından İstinye nâhiyesine tâbi‘ Sarıyar nâm karye ahâlîsinden olup ikrâr-ı âti’z-zikri tasdîka kendi tarafından asîl ve karye-i mezbûrede sâkine anası İstemihan bt. Abdullah nâm hâtun tarafından sâbitü’l-vekâle vekîli olan işbu râfi‘u’l-kitâb es-Seyyid Ahmed Çelebi b. es-Seyyid Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûrede vâki‘ bir tarafdan Odabaşızâde İbrahim Çelebi mülkü ve bir tarafdan dere ve bir tarafdan sâhil-i bahr ve bir tarafdan tarîk-i âm ile mahdûd tahtânî iki bâb mahzeni müştemil balık saydgâhı olup Doluyeri demeğle ma‘rûf mülk arsamı mezbûrân es-Seyyid Ahmed ve İstemihan Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile altı yüz guruşa iştirâken bey‘ u teslîm edip onlar dahi ber-vech-i muharrer ale’l-iştirâki’s-seviy iştirâ ve tesellüm ve kabz ve kabûl eyledi ba‘de’l-yevm sâbıku’z-zikr Doluyeri mezbûrân es-Seyyid Ahmed Çelebi ve İstemihan Hâtun’un ale’l-iştirâki’s-seviy mülk-i müşterâları olmuşdur keyfemâ yeşâân ve yahtârân mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Cumâdelâhire sene 1137 Şuhûdü’l-hâl: İbrahim b. Mustafa, Süleyman Yazıcı b. Ahmed, Halil Çelebi b. Mustafa, İbrahim Ağa b. Ali, Bekir Çelebi b. Mustafa, Ebûbekir Çelebi b. Şa‘ban el-müezzin, el-Hâc Mehmed Kapudan b. Hüseyin, Yahya Beşe b. Memiş, Ya‘kub Beşe b. Ali, Memiş Beşe b. Receb, Molla Mustafa b. Mehmed, Bektaş Beşe b. Mehmed, Süleyman Reis b. Mehmed, Halil Çelebi b. el-Hâc Mehmed, Ahmed Efendi b. el-Hâc Mehmed.