Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 57 Hüküm no: 8 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstemihan bt. Abdullah ve oğlunun bey‘ bi’l-istiğlâl yoluyla İsmail Efendi Nakid Vakfı’ndan ödünç aldıkları Mahrûse-i Galata muzâfâtından İstinye nâhiyesine tâbi‘ Sarıyar nâm karye ahâlîsinden olup ikrâr-ı âti’z-zikre kendi tarafından asîl ve anası olup hâlâ karye-i mezbûrede sâkine İsmihan bt. Abdullah b. Abdülmennân nâm hâtun tarafından vekîl olduğu zât-ı mezbûreyi ma‘rifet-i şer‘iyye ile ârifân Memiş Reis b. Receb ve Süleyman Beşe b. Mehmed nâm kimesneler şehâdetleriyle sâbit olmağla vekâleten meclis-i şer‘-i hatîr-i lâzimü’t-tevkīrde merhûm İsmail Efendi nâm sâhibü’l-hayrın nükūd-ı mevkūfesine mütevellî olan işbu râfi‘u’l-kitâb Halil Çelebi b. el-Hâc Mehmed nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip anam müvekkile-i mezbûre İstemihan Hâtun ile ale’l-iştirâki’s-seviy mülkümüz olup karye-i mezbûrede vâki‘ bir tarafdan Odabaşızâde İbrahim Çelebi mülkü ve bir tarafdan dere ve bir tarafdan sâhil-i bahr ve bir tarafdan tarîk-i âm ile mahdûd tahtânî iki bâb mahzeni müştemil balık saydgâhı olup Doluyeri demeğle ma‘rûf mülk arsamızı mütevellî-i mezbûr Halil Çelebi’ye bi-tarîki’l-istiğlâl dört yüz guruşa bey‘ u teslîm edip ol dahi yedinde olan mâl-i vakf-ı mezbûr ile ber-vech-i muharrer iştirâ ve tesellüm eyledikden sonra semeni olan dört yüz guruşu mâl-ı vakf-ı mezbûrdan olmak üzere mütevellî-i mezbûr Halil Çelebi yedinden tamâmen ahz u kabz eylediğimizden sonra mütevellî-i mezbûr Halil Çelebi sâlifü’z-zikr mahzen Doluyeri’ni ba‘de’t-tahliyeti’ş-şer‘iyye ve’t-tekābuzu’l-mer‘î senevî altmış guruşa olmak üzere târih-i kitâbdan üç sene tamâmına değin akd-i vâhid ile bize îcâr ve teslîm eyledikde biz dahi ber-vech-i muharrer istîcâr ve kabûl eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Cemâziyelâhir sene 1137. Şuhûdü’l-hâl: Ahmed Efendi b. el-Hâc Mehmed, Abdullah Bey b. Osman, Molla Mustafa b. Mehmed, Bektaş Beşe b. Mehmed, Ya‘kub Beşe b. Ali, Yahya Beşe b. Memiş, İbrahim Ağa b. Ali, el-Hâc Mehmed b. Abdullah, Süleyman Yazıcı, Bekir Çelebi b. Mustafa, İbrahim Ağa b. Ali.