Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 58 Hüküm no: 9 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Osman’ın es-Seyyid Ali b. Hasan’dan anlaşarak boşandığı (muhâlaa) Mahrûse-i Galata’da Alacamescid mahallesinde sâkine Hadice bt. Osman b. Osman b. İslâm nâm hâtun tarafından zikri âtî hul‘ ve ibrâyı ikrâra vekîl olduğu zât-ı mezbûreyi ma‘rifet-i şer‘iyye ile ârifân Ali Çelebi b. Abdullah ve Hüseyin Çelebi b. Hasan nâm kimesneler şehâdetleriyle şer‘an sâbit olan Ali Efendi b. Mehmed nâm kimesne meclis-i şer‘de müvekkile-i mezbûre Hadice Hâtun’un zevc-i muhâlı‘ı işbu râfi‘u’l-kitâb es-Seyyid Ali b. Hasan nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûrenin zevci mezbûr es-Seyyid Ali ile beynlerinde adem-i hüsn-i mu‘âşeretden nâşî hul‘a tâlibe ve râgıbe olduğu ecilden zimmetinde mütekarrır ve ma‘kūdün-aleyh olan iki def‘ada dört bin sekiz yüz akçe mehr-i müeccelinin altı yüz akçesini müvekkile-i mezbûre Hadice Hâtun’a def‘ u teslîm edip ol dahi ba‘de’l-ahz mâ‘adâsı olan dört bin iki yüz akçesinden fâriğa olup nafaka-i iddet ve me’ûnet-i süknâsı kendi üzerine olmak üzere zevci mezbûr es-Seyyid Ali ile muhâla‘a-i sahîha-i şer‘iyye ile hul‘ olduğunda mezbûr es-Seyyid Ali dahi ber-vech-i muharrer hul‘-i mezbûru kabûl eyledikden sonra hukūk-ı zevciyyete vesâire müte‘allika âmme-i da‘vâdan her biri âharın zimmetini ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Cemâziyelâhir sene 1137. Şuhûdü’l-hâl: es-Seyyid Veli b. es-Seyyid Hasan, Halil Çelebi b. Mustafa, Molla İbrahim el-mukayyid, İbrahim b. Mustafa, Mustafa b. Receb, Ali Çelebi b. Ahmed, Mehmed b. Ahmed