Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 59 Hüküm no: 10 Orijinal metin no: [2a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’ın menzilinin Usta Mustafa b. Mehmed’e satıldığı Mahrûse-i Galata hâricinde Bedreddin Bey mahallesinde sâkin iken bundan akdem vefât eden Mehmed b. Abdullah’ın verâseti zevce-i metrûkesi Meryem bt. Hasan nâm hâtun ile sulbî kebîr oğulları İbrahim ve Salih nâm kimesnelere ve sulbiye kebîre kızı Âişe nâm hâtuna münhasıra olduğu lede’ş-şer‘i’l-enver zâhir ve mukarrer oldukdan sonra mezbûre Âişe Hâtun asâleten ve mezbûr İbrahim kendi kıbelinden <>asâleten ve mezbûre Meryem Hâtun tarafından bey‘-i âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân Mustafa Çavuş b. Hüseyin ve Usta Bayram b. Mustafa nâm kimesneler şehâdetleriyle sâbit olmağla vekâleten ve mezbûr Salih tarafından kezâlik bey‘-i âti’z-zikre vekîli olduğu Hasan b. Osman ve Usta Bayram b. Mustafa nâm kimesneler şehâdetleriyle sâbit olan Mehmed b. Abdülkādir nâm kimesne vekâleten meclis-i şer‘de hâlâ demirci başı olan işbu râfi‘u’l-vesîka Usta Mustafa b. Mehmed nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip müteveffâ-yı mezkûrun terekesinden olmağla vefâtı hasebiyle verese-i mezkûresine mevrûs olup mahalle-i mezbûrede vâki‘ bir tarafdan Arnavud İbrahim nâm kimesne mülkü ve bir tarafdan Tersane duvarı ve bir tarafdan Hüsmen nâm kimesne menzili ve bir tarafdan tarîk-i âm ile mahdûd fevkānî iki bâb oda ve bir sofa ve tahtında bir bâb oda ve kenîfi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Usta Mustafa’ya elli beş guruşa bey‘ u temlîk ve teslîm eylediğimizde ol dahi ber-vech-i takrîr iştirâ ve temellük ve tesellüm ve kabûl eyledikden sonra semeni olan meblağ-ı mezbûru mezbûr Usta Mustafa yedinden hâlâ asâleten ve bi’l-vekâle bi-kadri’l-hısas tamâmen ahz ü kabz eyledik ba‘de’l-yevm menzil-i mahdûd-ı mezbûr mezbûr Usta Mustafa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Cemâziyelâhir sene 1137 Şuhûdü’l-hâl: İsmail Kapudan b. Ahmed, Usta Hasan b. Mustafa, Kahveci Abdurrahman b. Hasan, Ali Beşe b. Ahmed, Usta İbrahim b. Mustafa, Hasan Beşe b. Mustafa, Mehmed Beşe b. Abdülkādir.