Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 60 Hüküm no: 11 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hasan b. Ali’nin Gürcü asıllı kölesi Süleyman b. Abdullah’ı azat ettiği Mahrûse-i Galata’da Câmi‘-i Kebîr mahallesinde sâkin iken bundan akdem vefât eden el-Hâc Hasan b. Ali nâm kimesnenin verâseti zevce-i metrûkesi Ümmügülsüm bt. Mustafa nâm hâtuna ve sulbî kebîr oğlu Mehmed Çelebi nâm kimesneye münhasıra ve tashîh-i meselesi bi-hükmi’l-ferâiz sekiz sehimden olmağla sihâm-ı mezbûreden bir sehmi mezbûre Ümmügülsüm ve yedi sehmi mezbûr Mehmed Çelebi’ye isâbet eylediği lede’ş-şer‘i’l-enver zâhir ve mukarrer oldukdan sonra mezbûr Mehmed Çelebi kendi tarafından asâleten ve anası mezbûre Ümmügülsüm tarafından ıtk-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân Süleyman Çelebi b. Halil ve el-Hâc Mustafa b. Ahmed nâm kimesneler şehâdetleriyle sâbit olmağla vekâleten meclis-i şer‘-i hatîr-i lâzimü’t-tevkīrde müteveffâ-yı mezbûra ile’l-vefât rıkkını mu‘terif olup ba‘de vefâtihî verese-i mezbûresine mevrûs olan işbu uzun boylu açık kaşlı Gürciyyü’l-asl Müslimü’l-mille râfi‘u’l-kabâle Süleyman b. Abdullah mahzarında bi’l-asâle ve bi’l-vekâle ikrâr ve takrîr-i kelâm edip mevsûf-ı mezbûr Süleyman’ı asâlet ve vekâletim hasebiyle yedinde makbûzum olan seksen guruş üzerine mâlımdan tahrîr ve i‘tâk ve zümre-i ahrâr-ı asliyyeye idrâc ve ilsâk eyledim ba‘de’l-yevm mevsûf-ı mezbûr Süleyman sâir ahrâr-ı asliyyîn gibi hür olup üzerinde velâ-i şer‘iyyeden gayri hakkımız kalmamışdır dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Cemâziyelâhir sene 1137 Şuhûdü’l-hâl: el-Hâc Abdullah b. Mehmed, Abdullah Çelebi b. Hüseyin, Mehmed Çelebi b. Mehmed Çavuş, Süleyman Çelebi b. Mehmed, Mehmed Çelebi b. Halil, el-Hâc Mustafa b. Ahmed, el-Hâc Mehmed b. el-Hâc Ahmed, Molla Abdurrahim b. Osman, İbrahim Bey.