Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 60 Hüküm no: 12 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdülkerim Ağa’nın menzil hissesini el-Hâc Mehmed Ağa b. Ahmed’e sattığı Mahrûse-i Galata a‘mâlinden kasaba-i Kasımpaşa’da el-Hâc Ahmed mahallesinde vâki‘ bir tarafdan ba‘zen Havva ve ba‘zen Rahime nâm hâtunlar mülkleri ve bir tarafdan ba‘zen el-Hâc Ahmed veresesi ve ba‘zen Kalaycı Himmet veresesi mülkleri ve bir tarafdan İvaz Efendi bahçesi ve bir tarafdan Baltacı el-Hâc Ahmed mülkü ve bir tarafdan tarîk-i âm ile mahdûd mümtâz fevkānî üç bâb oda ve bir sofa ve tahtında ahur ve samanlık ve tahtânî sekiz bâb oda ve biri kebîr ve biri sagīr iki köşk ve altı aded kebîr bostan kapısı ve iki sagīr kapı ve kenîf ve yüz dib dut ve elli dört ayva ve yüz kırk yedi şeftali ve yirmi yedi erik ve iki enâr ve on beş kayısı ve dört ceviz ve altı fındık ve dört armut ve on dört asma ve yirmi dört incir ve bir Trabzon hurması ve bir kara dut eşcârlarını müştemil olup arsasının senevî Sultan Bayezid Vakfı’na yüz elli sekiz akçe mukāta‘a-i kadîmesi olan mülk menzilin iki yüz altmış dört sehimden otuz üç sehmi irsen Havva bt. Abdullah’ın ve altmış üç sehmi Mustafa Ağa’nın ve yirmi yedişer sehmi kız karındaşlar olan Âişe ve Fâtıma ve Rukiye benât-ı Abdülkerîm Ağa’dan her birinin ve yedişer sehmi Abdullah ve diğer Fâtıma ve diğer Âişe’den her birinin ve seksen dört sehmi şirâen el-Hâc Mehmed Ağa b. Ahmed’in iştirâken mülkleri olduğu yedlerinde olan hüccet-i şer‘iyyeleri mûcebince lede’ş-şer‘i’l-enver zâhir ve mukarrer oldukdan sonra mezbûre Rukiye Hâtun’un karındaşı ve tarafından menzil-i mahdûd-ı mezbûrda olan mikdâr-ı mezbûr hisse-i irsiyyesi âhara bey‘ ve kabz-ı semene ve kendüye îsâle ve umûr-ı mezkûra mütevakkıfe olduğu husûsların küllîsine vekîli olduğu zât-ı mezbûreyi ma‘rifet-i şer‘iyye ile ârifân karındaşı Mustafa Ağa b. Abdülkerîm ve Abdi Çelebi b. Mehmed şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan Halil Ağa b. Abdülkerîm mahfil-i şer‘-i hatîr-i lâzimü’t-tevkīrde işbu râfi‘u’l-vesîka mezbûr el-Hâc Mehmed mahzarında bi’l-vekâle ikrâr ve takrîr-i kelâm edip akd-i âtî sudûruna değin kız karındaşım müvekkile-i mezbûre Rukiye Hâtun’un bâlâda zikr u beyân olduğu üzere menzil-i mahdûd-ı mezbûrda olan iki yüz altmış dört sehimden yirmi yedi sehm hisse-i irsiyyesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile bi’l-vekâle mezbûr yüz altmış guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru müşterî-i mezbûr yedinden tamâmen alıp kabz eyledim fîmâ ba‘d kız karındaşım müvekkile-i mezbûre Rukiye Hâtun’un menzil-i mahdûd-ı mezbûrda olan iki yüz altmış dört sehimden yirmi yedi sehm hisse-i irsiyyesi bi-cümletin mâ yeştemilühâ müşterî-i mezbûr el-Hâc Mehmed’in mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Cemâziyelâhir li-sene 1137 Şuhûdü’l-hâl: Mustafa Ağa b. Ebûbekir bevvâb-ı sultânî, el-Hâc İsmail b. İbrahim, Hasan Bey b. Ali, Mehmed Çelebi b. el-Hâc Ali, İbrahim b. Muharrem, Halil b. Mustafa, İbrahim b. Mustafa, Mehmed b. Ahmed.