Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 62 Hüküm no: 14 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katerina bt. Nikorozi v. Toma’nın menzil hissesini Nikola v. Golamo’ya sattığı Mahrûse-i Galata hâricinde Kalafatcıbaşı mahallesinde sâkine Katerina bt. Nikorozi v. Toma nâm Nasrâniyenin sadrî kebîr oğlu ve tarafından bey‘-i âti’z-zikri ikrâra vekîli olduğu merkūmenin şahsını ma‘rifet-i şer‘iyye ile ârifân sadrî oğlu Paho v. Golamo ve dâmâdı diğer Paho v. Dominiko nâm tercümânlar şehâdetleriyle sâbit olan Cuvan v. Golamo nâm tercümân meclis-i şer‘de müvekkile-i merkūmenin sadrî kebîr oğlu işbu sâhibü’r-rakīm Nikola v. Golamo nâm tercümân muvâcehesinde bi’l-vekâle ikrâr ve takrîr-i kelâm edip anam müvekkile-i merkūme Katerina akd-i âtî sudûruna değin silk-i mülkünde münselik olup Hâslar kazâsına tâbi‘ Ortabelgrad nâm karyede vâki‘ bir tarafdan Lukaki nâm tercümân çiftliği ve bir tarafdan Nadona veresesi mülkleri ve iki tarafdan tarîk-i âm ile mahdûd fevkānî beş bâb oda ve bir sofa ve dehlîz ve bir köşk ve kenîf ve tahtânî iki bâb oda ve bir matbah ve bir kilâr ve ahur ve havluyu müştemil mülk menzilin nısf-ı şâyi‘i karındaşım tercümân-ı merkūm Nikola’nın ve nısf-ı şâyi‘-i âharı anam müvekkile merkūme Katerina’nın mülkü olmağın anam müvekkile-i merkūme Katerina menzil-i mahdûd-ı mezkûrda olan nısf hisse-i şâyi‘asını kebîr oğlu tercümân-ı merkūm Nikola’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz elli guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr iki yüz elli guruşu oğlu merkūm Nikola tercümân yedinden bi’t-tamâm ahz u kabz ve nısf-ı menzile müte‘allika da‘vâdan tercümân-ı merkūm Nikola’nın zimmetini ibrâ ve ıskāt eyledi ba‘de’l-yevm menzil-i mahdûd-ı mezkûrun mecmû‘u tercümân-ı merkūm Nikola’nın mülkü olup anam müvekkile-i merkūme Katerina’nın kat‘an alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî ve’l-ışrîn min-Cemâziyelâhir li-sene 1137. Şuhûdü’l-hâl: es-Seyyid Mustafa Çelebi b. Seyyid Ali, es-Seyyid Ali b. es-Seyyid Bekir, Fırıncı Ali Beşe b. Şa‘ban, Ahmed Çelebi b. Mehmed el-münâdî, Mehmed b. Ahmed, Halil Beşe b. Abdullah, Mustafa Beşe b. Hasan, İbrahim b. Muharrem berber, Halil b. Mustafa, Mustafa b. Ahmed.