Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 63 Hüküm no: 15 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dominika v. Golamo’nun müşterek menzil hissesini Nikola v. Golamo’ya sattığı Mahrûse-i Galata hâricinde Hüseyin Ağa mahallesinde sâkine Dominika bt. Golamo v. Cuvan nâm Nasrâniyenin zevci ve tarafından bey‘-i âti’z-zikri ikrâra vekîl olduğu merkūmenin şahsını ma‘rifet-i şer‘iyye ile ârifân Halil Beşe b. Abdullah ve Mustafa Beşe b. Hasan nâm kimesneler şehâdetleriyle sâbit olan Naço v. Dominiko nâm tercümân meclis-i şer‘de müvekkile-i merkūmenin karındaşı işbu sahibü’r-rakīm Nikola v. Golamo nâm tercümân muvâcehesinde bi’l-vekâle ikrâr ve takrîr-i kelâm edip zevcem müvekkile-i merkūme Dominiko akd-i âtî sudûruna değin silk-i mülkünde münselik olup Hâslar kazâsına tâbi‘ Ortabelgrad nâm karyede vâki‘ bir tarafdan Lukaki nâm tercümân çiftliği ve bir tarafdan Nadona veresesi mülkleri ve iki tarafdan tarîk-i âm ile mahdûd fevkānî beş bâb oda ve bir sofa ve dehlîz ve bir köşk ve kenîf ve tahtânî iki bâb oda ve bir matbah ve kilâr ve ahur ve havluyu müştemil mülk menzilde olan nısf hisse-i şâyi‘asını karındaşı tercümân-ı merkūm Nikola’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile iki yüz elli guruşa bey‘ u temlîk ve teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr iki yüz elli guruşu karındaşı tercümân-ı merkūm Nikola yedinden bi’t-tamâm ve’l-kemâl ahz u kabz ve hisse-i mezbûrenin gabn ve tağrîrine müte‘allika da‘vâdan tercümân-ı merkūm Nikola’nın zimmetini ibrâ ve ıskāt eyledi ba‘de’l-yevm zevcem müvekkile-i merkūme Dominika’nın menzil-i mezkûrda olan nısf hisse-i şâyi‘ası bi-cemî‘i mâ yeştemiluhû ve yahvîhi tercümân-ı merkūm Nikola’nın mülk-i müşterâsı olup müvekkile-i merkūme[nin] kat‘an alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî ve’l-ışrîn min-Cemâziyelâhir li-sene 1137. Şuhûdü’l-hâl: es-Sâbikūn.