Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 64 Hüküm no: 16 Orijinal metin no: [2b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un Mehmed Efendi b. Ahmed’den muhalaa ile boşandığı Mahrûse-i Galata’da Câmi‘-i Kebîr mahallesinde sâkine Rukiye nâm hâtunun babası ve tarafından zikirleri câî hul‘ ve ibrâyı ikrâra vekîli olduğu mezbûrenin zâtını ma‘rifet-i şer‘iyye ile ârifân el-Hâc Ömer Efendi b. Mehmed ve Hüseyin Efendi b. Hüseyin şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan Hasan Efendi b. Ahmed mahfil-i şer‘de müvekkile-i mezbûrenin zevc-i muhâlı‘ı işbu râfi‘u’l-kitâb Mehmed Efendi b. Ahmed mahzarında bi’l-vekâle ikrâr ve takrîr-i kelâm edip kızım müvekkile-i mezbûre Rukiye Hâtun zevci mezbûr Mehmed Efendi ile beynlerinde adem-i hüsn-i mu‘âşeretden nâşî hul‘a tâlibe ve râgıbe olup mezbûrun zimmetinde mütekarrır ve ma‘kūdün-aleyh olan altı bin akçe mehr-i mü’eccelden fâriğa olup nafaka-i iddet ve me’ûnet-i süknâsı kendi üzerine olup ve zevci mezbûr Mehmed Efendi’den dokuz aylık mikdârı hamli olmağla ba‘de’l-velâdet yedi yaşına değin şer‘an kendi mâlından infâk ve iksâ eylemek üzere zevci mezbûr Mehmed Efendi ile muhâla‘a-i sahîha ile muhâla‘a olduğunda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete ve târih-i kitâba gelince sâir beynlerinde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan kızım müvekkile-i mezbûre Rukiye Hâtun’un mezbûr Mehmed Efendi’nin zimmetini ibrâ ve ıskāt eyleyip ol dahi kezâlik kızım müvekkile-i mezbûrenin zimmetini ibrâ ve ıskāt eyledi dedikde gıbbe’t-tasdîki’ş-şer‘î ketb olundu. Fi’l-yevmi’s-sâmin aşer min-Cemâziyelâhir li-sene 1137. Şuhûdü’l-hâl: Ahmed Kapudan b. Mustafa, Mehmed Çelebi el-müezzin, Arusi Mustafa Efendi, İbrahim b. Muharrem, Halil b. Mustafa, Süleyman Efendi b. Osman, Mehmed b. Ahmed.