Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 65 Hüküm no: 18 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Osman’ın menzilini kocası el-Hâc Hüseyin b. Abdullah’a sattığı Mahrûse-i Galata hâricinde Kalafatcıbaşı mahallesinde sâkine olup zâtı Abdullah Çelebi b. Mustafa ve Ahmed Beşe b. Mustafa ta‘rîfleriyle mu‘arrefe olan Afife bt. Osman nâm hâtun meclis-i şer‘de zevci işbu râfi‘u’l-vesîka el-Hâc Hüseyin b. Abdullah mahzarında ikrâr ve takrîr-i kelâm edip akd-i âtî sudûruna değin yedimde mülk ve hakkım olup mahalle-i mezbûrede vâki‘ bir tarafdan Abdi Odabaşı menzili ve iki tarafdan Emine ve İstemihan nâm hâtunlar menzilleri ve bir tarafdan mekābir-i Müslimîn ile mahdûd fevkānî bir bâb oda ve bir sofa ve dehlîz ve tahta-pûş ve kenîf ve tahtânî bir bâb oda ve kilâr ve kenîf ve bi’r-i mâ ve bir mikdâr havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim mezbûr el-Hâc Hüseyin’e iki yüz guruşa bey‘ u teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru zevcim müşterî-i mezbûr el-Hâc Hüseyin yedinden tamâmen alıp kabz eyledim fîmâ ba‘d menzil-i mahdûd-ı merkūm bi-cümletin mâ yeştemilühû ve yahvîhi zevcim müşterî-i mezbûr el-Hâc Hüseyin’in mülk-i müşterâsı[dır]keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Cemâziyelâhir li-sene 1137. Şuhûdü’l-hâl: Duhânî el-Hâc Mehmed, Ali Beşe b. Mustafa, Yemişci Mehmed Çelebi, Duhânî Mustafa Beşe, Duhânî İbrahim b. Ahmed, Duhânî el-Hâc Mehmed, İbrahim b. Receb.