Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 65 Hüküm no: 19 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mikail v. Şöhret’in arsasını Kobasır v. Parnık’a sattığı Mahrûse-i Galata a‘mâlinden Beşiktaş nâhiyesine tâbi‘ Ortaköy kasabası sâkinlerinden Mikail v. Şohret nâm Ermeni mahfil-i şer‘de işbu râfi‘u’l-vesîka Kobasır v. Parnık nâm Ermeni muvâcehesinde ikrâr ve takrîr-i kelâm edip mahrûse-i merkūme hâricinde Hüseyin Ağa mahallesinde vâki‘ merhûm Sultan Bayezid Hân Vakfı’ndan senevî üç akçe mukāta‘a-i kadîmesi olan iki tarafdan benim menzilim ve bir tarafdan Manuk Ermeni menzili ve bir tarafdan tarîk-i âm ile mahdûd tûlen kırk beş buçuk ve arzen sekiz buçuk bi-hesâb-ı terbî‘ üç yüz seksen altı zirâ‘ menzil arsamı cemî‘ tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Kobasır’a seksen guruşa bey‘ u teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru müşterî-i merkūm yedinden tamâmen alıp kabz eyledim fîmâ ba‘d arsa-i mahdûde-i merkūme bi-cümletin mâ yeştemiluhâ müşterî-i merkūmun mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Cemâziyelâhir li-sene 1137. Şuhûdü’l-hâl: el-Hâc Ahmed b. Ali, el-Hâc Osman b. Receb, Arusi Mustafa Efendi, Manok v. Kariz, Manyas v. Avak, Yani v. Toros.