Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 66 Hüküm no: 20 Orijinal metin no: [3a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Hüseyin Reis’in eşyalarını kocası el-Hâc Mehmed Ağa b. Abdülkerim’e sattığı Mahrûse-i Galata hâricinde Müeyyedzâde mahallesinde sâkine olup zâtı İmâm el-Hâc Mehmed Efendi ve Müezzin Molla Abdurrahman ta‘rîfleriyle mu‘arrefe olan Rabia bt. Hüseyin Reis nâm hâtun mahfil-i şer‘de zevci işbu râfi‘u’l-vesîka el-Hâc Mehmed Ağa b. Abdülkerîm mahzarında ikrâr ve takrîr-i kelâm edip akd-i âtî sudûruna değin yedimde mülküm olan eşyâmdan bir cevâhir kuşak ve bir çift zümrüd küpe ve iki sîm kuşak ve bir müsta‘mel hatâyî kaplı sincap kürk ve yine hatâyî kaplı bir zerdeva kürk ve yine hatâyî kaplı bir paça kürk ve yine hatâyî kaplı bir yalancı kākım kürk ve sekiz minder ve on beş müsta‘mel çatma yasdık ve bir orta keçesi ve bir yan keçesi ve müsta‘mel on yemenî yorgan ve dört beledi döşek ve dört elvan hatâyî kaftan ma‘a anteri ve biri sof ve ikisi çuka üç müsta‘mel ferâce ve altmış vakiyye bakır evânımı bi-safkatin vâhidetin zevcim mezbûr el-Hâc Mehmed Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile dört yüz guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra eşyâ-i merkūmenin semenlerine ve cem‘an semenleri olan meblağ-ı mezbûr dört yüz guruşa müte‘allika âmme-i de‘âvî ve mütâlebât ve eymân ve muhâsamâtdan zevcim mezbûr el-Hâc Mehmed Ağa’nın zimmetini ibrâ-i âmm-ı kātı‘u’n-nizâ‘a ibrâ ve ıskāt eyledim ba‘de’l-yevm eşyâ-i muharrere-i mezkûre zevcim mezbûr el-Hâc Mehmed Ağa’nın mülk-i müşterâsı olmuşdur benim eşyâ-i merkūmede kat‘an alâka ve medhalim yokdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî ve’l-ışrîn min-Cemâziyelâhir li-sene 1137 Şuhûdü’l-hâl: İmâm el-Hâc Mehmed Efendi, Müezzin Molla Abdurrahim, el-Hâc Mehmed Ağa, el-Hâc Ali b. Ahmed, el-Hâc Mustafa b. Ahmed, el-Hâc Mustafa b. Osman, el-Hâc Mehmed b. Ali, Ahmed Çelebi b. el-Hâc Hüseyin, es-Seyyid Osman b. es-Seyyid el-Hâc İbrahim, Pervizzâde el-Hâc Mustafa.