Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 67 Hüküm no: 21 Orijinal metin no: [3a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Hüseyin Reis’in menzilini kocası el-Hâc Mehmed Ağa b. Abdülkerim’e sattığı Mahrûse-i Galata hâricinde Müeyyedzâde mahallesinde sâkine olup zâtı el-Hâc Mehmed el-imâm ve Müezzin Molla Abdurrahim ta‘rîfleriyle mu‘arrefe olan Rabia bt. Hüseyin Reis nâm hâtun mahfil-i şer‘de zevci işbu râfi‘u’l-vesîka el-Hâc Mehmed Ağa b. Abdülkerîm mahzarında ikrâr ve takrîr-i kelâm edip akd-i âtî sudûruna değin silk-i mülkünde münselik olup zikr olunan Müeyyedzâde mahallesinde vâki‘ bir tarafdan el-Hâc Mehmed menzili ve bir tarafdan ba‘zen Kürkcü İsmail menzili ve ba‘zen Saliha Hâtun menzili ve bir tarafdan tarîk-i hâss ve bir tarafdan tarîk-i âm ile mahdûd ulyâda bir bâb oda ve bir sofa ve kilâr ve dehlîz vüstâda iki bâb oda ve bir matbah ve kenîf ve dehlîz ve süflâda bir bâb oda ve kenîf ve bi’r-i mâ ve bir mikdâr havluyu müştemil mülk menzilimi cemî‘ tevâbi‘ ve levâhıkı ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim mezbûr el-Hâc Mehmed Ağa’ya dört yüz guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyleyip menzil-i mezbûrun gabnine ve semeni olan meblağ-ı mezbûr dört yüz guruşa müte‘allika âmme-i de‘âvî ve eymân ve muhâsamâtdan zevcim müşterî-i mezbûr el-Hâc Mehmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı merkūm bi-cümletihî mâ yeştemilehû ve yahvîhi zevcim mezbûr el-Hâc Mehmed Ağa’nın mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî ve’l-ışrîn min-Cemâziyelâhir li-sene 1137. Şuhûdü’l-hâl: es-Sâbikūn.