Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 67 Hüküm no: 22 Orijinal metin no: [3a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. el-Hâc Hasan’ın Mehmed Efendi b. Mahmud’dan boşandığı Mahrûse-i Galata hâricinde Fındıklı kasabasında vâki‘ İlyas Çelebi mahallesinde sâkine Hadice bt. el-Hâc Hasan nâm hâtun zâtı ba‘de’t-ta‘rîfi’ş-şer‘î meclis-i şer‘de zevc-i sâbıkı işbu râfi‘u’l-vesîka Mehmed Efendi b. Mahmud mahzarında ikrâr ve takrîr-i kelâm edip mezbûr Mehmed Efendi mukaddemâ zevcim olup beni tatlîk etmeğle ben dahi mezbûrun zimmetinde mütekarrır olan yedi yüz akçe mehr-i mü’eccelimi mezbûrdan taleb ve da‘vâ eylediğimde ol dahi sen mikdâr-ı mezkûr mehr-i mü’eccelinden ve nafaka-i iddet ve me’ûnet-i süknândan geçip benimle muhâla‘a ve hukūk-ı zevciyyete vesâire müte‘allika âmme da‘vâdan benim zimmetimi ibrâ ve ıskāt etdin deyü ref‘ u def‘-i mezkûrunu isbât sadedinde iken beynimize muslihûn tavassut edip beni mezbûr Mehmed Efendi ile da‘vâ-yı mezkûremden üç yüz akçe üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh-i merkūmu yedinden alıp kabz eylediğimden sonra hukūk-ı zevciyyete vesâire müte‘allika âmme-i da‘vâdan mezbûr Mehmed Efendi’nin zimmetini ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Cemâziyelâhir li-sene 1137. Şuhûdü’l-hâl: Halil b. Mustafa, Mehmed b. Ahmed, Mehmed b. İbrahim, Süleyman b. Ahmed, Ahmed b. Mustafa.