Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 68 Hüküm no: 23 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Hüseyin ile Ali Bey b. Abdullah’ın müşterek menzillerini el-Hâc Osman Ağa’ya rehin verdikleri Mahrûse-i Galata’ya tâbi‘ kasaba-i Tophâne’de Kuloğlu mahallesinde sâkin Ali Bey b. Abdullah nâm kimesne ile zevcesi olup zâtı Abdullah Çelebi b. Ali ve Molla Mehmed b. Yusuf nâm kimesneler ta‘rîfleriyle mu‘arrefe olan Saliha bt. Hüseyin nâm hâtun meclis-i şer’de mahmiye-i İstanbul’da Aşıkpaşa mahallesinde sâkin el-Hâc Osman Ağa b. Osman b. Abdullah nâm kimesne tarafından ikrâr-ı âti’z-zikri tasdîka sâbitü’l-vekâle vekîli olan işbu râfi‘u’l-vesîka diğer Ali Bey b. Mehmed mahzarında her biri ikrâr ve takrîr-i kelâm edip bizim müvekkil-i mezbûr el-Hâc Osman Ağa’ya cihet-i deyn-i şer‘îden yüz elli guruş deynimiz olmağla meblağ-ı mezbûr mukābelesinde ale’l-iştirâki’s-seviy mülkümüz olup sâbıku’z-zikr Kuloğlu mahallesinde vâki‘ bir tarafdan el-Hâc Mehmed mülkü ve bir tarafdan Ömer Ağa mülkü ve bir tarafdan tarîk-i hâss ile mahdûd fevkānî iki bâb oda ve tahtânî bir bâb oda ve kenîf ve bi’r-i mâ ve bir mikdâr bahçeyi müştemil mülk menzilimizi müvekkil-i mezbûr el-Hâc Osman Ağa’ya ba‘de’t-tahliyeti’ş-şer‘iyye rehin ve teslîm eylediğimizde ol dahi ber-vech-i muharrer irtihân ve kabûl eyledi dediklerinde gıbbe’t-tasdîki’ş-şer‘î zevcân-ı mezbûrân Ali Bey ve Saliha Hâtun meclis-i mezkûrda Yusuf b. Abdullah nâm kimesne mahzarında her biri ikrâr ve takrîr-i kelâm edip müvekkil-i mezbûr el-Hâc Osman Ağa târih-i kitâb şehri gurresinden bir sene tamâmına değin bizi imhâl etmeğle bizim için müddet-i madrûbe tamâmında edâ-i deyn birle fekk-i rehin mümkün olmazsa menzil-i mahdûd-ı merkūmu semeni misli ile âhara bey‘ ve semenini kabza ve semen-i mezbûrdan meblağ-ı mezbûr yüz elli guruşu müvekkil-i mezbûr el-Hâc Osman Ağa’ya edâ ve teslîme ve fazla kalırsa bize îsâle noksân gelirse mâlımızdan tekmîl eylemek üzere azl ve in‘izâlden masûne vekâlet-i devriye ile mezbûr Yusuf’u tarafımızdan vekîl ve nâib-i menâb nasb ve ta‘yîn etdik dediklerinde ol dahi ber-vech-i muharrer vekâlet-i merkūmeyi kabûl ve hıdemâtı ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Cemâziyelâhir li-sene 1137. Şuhûdü’l-hâl: Abdullah b. Ali, Halil Çelebi b. Mustafa, Molla Mehmed b. Yusuf, Mehmed b. Ahmed, el-Hâc Mehmed b. Abdullah, Mehmed b. Ahmed.