Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 69 Hüküm no: 24 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın menzilinin yarı hissesini kocası İbrahim Çelebi b. Ahmed’e sattığı El-emru hasbemâ yahvîhi nemakahu’l-fakīr ileyhi celle şânuhû el-Hâc Mustafa el-Kādî bi-medîne-i Galata -gufira lehû- Mahrûse-i Galata’da Karamustafa Paşa mahallesinde sâkine zâtı İmâm Mehmed Efendi b. Abdurrahman ve Müezzin el-Hâc Mustafa b. Yusuf nâm kimesneler ta‘rîfleriyle mu‘arrefe olan Âişe bt. Abdullah nâm hâtun meclis-i şer‘de zevci işbu sâhibü’l-kitâb İbrahim Çelebi b. Ahmed nâm kimesne mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan el-Hâc Ahmed mülkü ve bir tarafdan Yasakcı Ali Beşe mülkü ve bir tarafdan el-Hâc Hasan menzili ve bir tarafdan tarîk-i âm ile mahdûd fevkānî bir bâb oda ve bir matbah ve bir sofa ve tahtânî mahtab ve kenîf ve müşterek bi’r-i mâyı müştemil mülk menzilimin nısf-ı şâyi‘ini zevcim mezbûr İbrahim Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz guruşu mezbûr İbrahim Çelebi’ye karz-ı şer‘îden deynim olan yüz guruşa takās eylediğimde ol dahi ber-vech-i muharrer mukāssa ve kabûl etmeğin ba‘de’l-yevm menzil-i mahdûd-ı mezkûrun nısf-ı şâyi‘i zevcim mezbûr İbrahim’in mülk-i müşterâsı olup benim kat‘ā alâka ve medhalim yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Cemâziyelâhir li-sene 1137. Şuhûdü’l-hâl: İbrahim Çelebi b. Ahmed el-müezzin, Yusuf b. Abdullah, Mehmed Beşe b. Mustafa, el-Hâc Mehmed b. Mehmed, el-Hâc Hasan b. Fazlı, Halil b. Mustafa, Mustafa b. Ahmed.