Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 70 Hüküm no: 26 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keşfi es-Seyyid Osman’ın vakıf menzilinin yarı hissesine Fatıma bt. Osman’la kocası Hüseyin Ağa b. Osman’ın mütevelli oldukları El-emru hasbemâ hurrire fîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira lehû-. Husûs-ı âti’z-zikrin mahallinde taksîmi iltimâs olunmağın savb-ı şer‘-i enverden mevlânâ Mustafa Efendi b. Hasan me’zûnen irsâl ol dahi hâssa mi‘mârlardan Üstâd es-Seyyid Mustafa Halife b. Eyüb ve Ali Halife b. Ahmed ile merhûm Keşfi es-Seyyid Osman nâm sâhibü’l-menzil mahrûsa-i Galata muzâfâtından kasaba-i Kasımpaşa’da Kulaksız mahallesinde binâ eylediği câmi‘-i şerîfi kurbünde vâki‘ gallesi evlâd-ı evlâdına meşrûta olan vakıf menzili üzerine varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde mahmiye-i İstanbul’da Seferikoz mahallesinde sâkine Fâtıma bt. Osman b. Abdullah nâm hâtunun zevci ve tarafından zikri âtî husûsa vekîli olduğu zât-ı mezbûreyi ma‘rifet-i şer‘iyye ile ârifân es-Seyyid Mehmed b. es-Seyyid Ramazan ve Mustafa Çelebi b. Ahmed nâm kimesneler şehâdetleriyle sâbit olan işbu râfi‘u’l-kitâb Mehmed Çelebi b. İbrahim nâm kimesne meclis-i ma‘kūd-ı mezbûrda Hüseyin Ağa b. Osman nâm kimesne mahzarında vâkıf-ı mûmâ-ileyhin evkāfına evlâdiyyet ve meşrûtiyyet üzere mütevelliye olan Şerife Fâtıma Hâtun’un zevci ve umûr-ı tevliyetini ikāmete kāimmakāmı olan el-Hâc Mehmed hâzır oluğu hâlde bi’l-vekâle takrîr-i kelâm edip vâkıf-ı mûmâ-ileyhin gallesi evlâd-ı evlâdına meşrûta vakfı olup mahalle-i mezbûrede vâki‘ bir tarafdan vakf-ı mezbûrdan Âişe Hâtun tasarrufunda olan menzil ve bir tarafdan vakf-ı mezbûrdan arsa-i hâliye ve bir tarafdan yine vakf-ı mezbûrdan Hadice Hâtun bahçesi ve bir tarafdan tarîk-i âm ile mahdûd fevkānî iki bâb oda ve bir sofa ve dehlîz ve kenîf ve mağsel ve vüstâda bir kenîf ve dehlîz ve sokak tarafında bir bâb bakkal dükkânını müştemil vakıf menzil icâre-i mu‘accele-i ma‘lûme ve ayda yirmi akçe icâre-i mü’eccele ile zevcem müvekkile-i mezbûre Fâtıma Hâtun ile mezbûr Hüseyin Ağa’nın nısfiyyet üzere taht-ı tasarruflarında olmağla menzil-i mezbûru bi’t-terâzî beynlerinde ma‘rifet-i mütevellî ile taksîm murâd eylediklerinde mi‘mârân-ı mezbûrân mesâhasıyla tûlen ve arzan bi-hesâb-ı terbî‘ yetmiş bir zirâ‘ arsa üzerinde vâki‘ bir tarafdan Hadice Hâtun bahçesi ve bir tarafdan vakıf arsa ve bir tarafdan mezbûr Hüseyin Ağa hissesine ta‘yîn olunan mahall ve bir tarafdan tarîk-i âm ile mahdûd fevkānî bir bâb oda ve nısf dehlîz ve bir mağsel ve kenîf ve vüstâda dehlîz ve kenîf ve bakkal dükkânı ve tûlen ve arzan bi-hesâb-ı terbî‘ yetmiş iki buçuk zirâ‘ arsa-i hâliye başka sokak kapısı açmak üzere ayda on akçe icâre-i mü’eccele ile zevcem müvekkile-i mezbûre Fâtıma Hâtun’un nısf hissesine ta‘yîn ve tahsîs olunup ve tûlen ve arzan bi-hesâb-ı terbî‘ yetmiş bir buçuk zirâ‘ arsa üzerinde vâki‘ bir tarafdan Âişe Hâtun menzili ve bir tarafdan vakıf arsa ve bir tarafdan mezbûre Fâtıma Hâtun hissesine ta‘yîn olunan mahal ve bir tarafdan tarîk-i âm ile mahdûd fevkānî bir bâb oda ve bir kebîr sofa ve nısf dehlîz ve tahtânî ahur ve sokak kapısı ve tûlen ve arzan bi-hesâb-ı terbî‘ yetmiş iki buçuk zirâ‘ arsa-i hâliye ayda on akçe icâre-i mü’eccele ile mezbûr Hüseyin Ağa’nın nısf hissesine ta‘yîn ve tahsîs olunup ve hisseteyn-i mezbûreteyn beynlerine alâmât-ı fâsıla vaz‘ ve her birimiz bi’l-asâle ve bi’l-vekâle hisselerimizi ma‘rifet-i mütevellî ile ahz u kabz eyledik dedikde mezkûr Hüseyin Ağa dahi vekîl-i mezbûr Mehmed Çelebi’yi akvâl-i meşrûhasında ba‘de’t-tasdîk vâki‘-i hâli mevlânâ-yı mezbûr mahallinde ketb u tahrîr ve ma‘an ba‘s olunan Çukadâr Hasan Beşe b. Abdullah ve Muhzır Mehmed b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ-hüve’l-vâkı‘ li-ecli’t-tevsîk bi’l-ibtigā ketb olundu. Fi’l-yevmi’l-hâdî aşer min-Cemâziyelâhir li-sene 1137. Şuhûdü’l-hâl: el-Hâc Ali b. Ahmed, Ali Ağa b. Mehmed, Mustafa Çelebi b. Ahmed, Hasan b. Mustafa, Halil b. Abdullah, Salih Çelebi b. Mehmed, İbrahim Çelebi b. Abdullah, Mehmed Çelebi b. Abdullah, es-Seyyid Mehmed Çelebi b. es-Seyyid Mustafa, Hüseyin Çavuş b. Rıdvan.