Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 75 Hüküm no: 32 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yovakim v. Tanaş’ın menzilini Kiryako v. Nikola’ya sattığı Fi’l-asl vilâyet-i Anadolu’da Ürgüb kazâsında nefs-i Ürgüb kasabasında vâki‘ Zimmî mahallesi sükkânından olup hâlâ mahrûse-i Galata’da balıkcı tâifesinden Yovakim v. Tanaş nâm zimmî meclis-i şer‘de işbu sâhibü’r-rakīm Kiryako v. Nikola nâm zimmî muvâcehesinde ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan Keşiş ve bir tarafdan Kostantin nâm zimmîler mülkleri ve bir tarafdan benim âhar mülküm ve bir tarafdan tarîk-i hâss ile mahdûd tahtânî iki bâb odayı müştemil mülk menzilimi merkūm Kiryako’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz dört guruşa bey‘ u temlîk edip ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr otuz dört guruşu merkūm Kiryako yedinden bi’t-tamâm ahz u kabz ve menzil-i mahdûd-ı mezkûru mahallinde kabz ve tasarrufa merkūm Kiryako’yu taslît eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi merkūm Kiryako’nun mülk-i müşterâsı olup benim kat‘an alâka ve medhalim yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Cemâziyelâhir li-sene 1137. Şuhûdü’l-hâl: Ali b. Osman, Osman b. Ömer, Kiryako v. Gümüş, Rombali v. Kiryako, Kalend v. Apostovil, Yako v. Mavroz, Apostol v. Serkeş, Nikola v. Aslan.