Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 76 Hüküm no: 33 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin gemisi battığı için yüklediği iç yağının ziyanı davasında Yorgi Reis’e müdahaleden men’i Mahrûse-i Galata muzâfâtından kasaba-i Fındıklı’da İbrahim Efendi mahallesinde sâkin tüccâr tâifesinden Mehmed Çelebi b. Mustafa nâm kimesne meclis-i şer‘de sefîne reislerinden işbu râfi‘u’r-rakīm Uzun Yorgi Reis v. Kiryako nâm zimmî muvâcehe[sinde] üzerine da‘vâ ve takrîr-i kelâm edip târih-i kitâbdan dört ay mukaddem vilâyet-i Rumeli’nde nehr-i Tuna sevâhilinde vâki‘ Kalas iskelesinde sefînesiyle İstanbul’a nakl eylemek üzere navl-ı ma‘lûm ile her vakiyyesi on ikişer akçe kıymetli üç yük içinde mevcûd bin iki yüz doksan vakiyye don yağımı merkūm Yorgi Reis’e def‘ u teslîm edip ol dahi ber-vech-i muharrer ahz ve sefînesine tahmîl eylemiş idi hâlâ zikr olunan üç yük yağımı merkūm Yorgi Reis’den taleb ederim suâl olunup teslîme tenbîh olunmak matlûbumdur dedikde gıbbe’s-suâl merkūm Yorgi Reis cevâbında fi’l-vâki‘ hâl müdde‘î-i mezbûrun bâlâda takrîr ve tafsîl eylediği minvâl üzere olduğunu ikrâr lâkin zikr olunan Kalas iskelesinden sefîne-i mezbûre ile İstanbul’a gelirken esnâ-i tarîkde şedîd fırtına zuhûr etmeğle yanımda olan sefîneler perâkende ve perîşân ve ba‘zısı gark ve helâk olup ben dahi sefînem ile Kırım adası üzerlerine geldiğimde benim için garkdan halâs ve bir vechile mümkün olmadığı nümâyân olduğu ecilden garkdan li-ecli’t-tahlîs müdde‘î-i mezbûrun üç yük yağını tüccâr-ı sâirenin emti‘alarıyla ma‘an deryâya ilkā eyledim deyü iddi‘â ve müdde‘î-i mezbûr dahi vech-i muharrer üzere fırtına vukū‘unu ikrâr ve i‘tirâf edip ve bu takdîrce merkūm Yorgi Reis’e zikr olunan üç yük don yağının vakt-i ilkāda olan kıymetini dāmin lâzım gelirken müdde‘î-i mezbûr Mehmed Çelebi zikr olunan yağın vakt-i ilkāda olan kıymetini ta‘yîne kādir olmamağın mûcebiyle müdde‘î-i mezbûr bilâ vech-i şer‘î merkūm Yorgi Reis’e mu‘âraza ve müdâhaleden men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Cemâziyelâhir li-sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Mustafa b. Ahmed, Mustafa b. Hüseyin, Mustafa Beşe b. Receb, Ebûbekir b. Hüseyin.