Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 76 Hüküm no: 34 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meslekten ihraç edilen Halatçı Ali Reis’in halatçı kethüdası Süleyman Beşe ile olan davasında sulh olduğu Mahrûse-i Galata’da sâkin halatçı tâifesinden Ali Reis b. ( ) mahfil-i şer‘de tâife-i merkūmenin kethudâları işbu râfi‘u’l-vesîka Süleyman Beşe ve yiğitbaşıları Hasan Reis ve müsinn ve ihtiyâr ustalarından Çelebi el-Hâc Mehmed ve el-Hâc Hasan b. el-Hâc Ali ve Ali Beşe b. el-Hâc Ömer ve Abdurrahman b. Hasan ve Halil b. Mehmed ve Mustafa b. Ömer ve Mahmud b. el-Hâc Mehmed ve İbrahim b. Hasan ve Hüseyin b. Hasan ve el-Hâc Mehmed b. Murad ve Mustafa b. Himmet ve Bekir b. Ömer Yazıcı ve el-Hâc Ali b. Abdurrahman nâm kimesneler vesâirleri mahzarlarında ikrâr ve takrîr-i kelâm edip bundan akdem tâife-i merkūma bir husûs için beni içlerinden ihrâc etmeleriyle ben dahi kethudâ-yı mezbûr Süleyman Beşe’den otuz kantar tel ve otuz bin aded halat demiri ve küçük kule kapısı hendeğinde mâlım ile tecdîd eylediğim araba ve iskemlesiyle ma‘an destgâh ve yetmiş beş guruş destgâh kirâsını taleb ve da‘vâ sadedinde iken beynimize muslihûn tavassut edip beni mezbûr Süleyman Beşe ile da‘vâ-yı mezkûremden an-inkâr kırk guruş üzerine sulh eylediklerinde ben dahi ber-vech-i muharrer sulh-i merkūmu kabûl ve bedel-i sulh olan meblağ-ı mezbûru kethudâ-yı merkūm yedinden tamâmen alıp kabz eylediğimden sonra zikirleri mârr olan dest-gâh ve otuz kantar tel ve yetmiş beş guruş destgâh kirâsı vesâire müte‘allika âmme-i da‘vâdan mezbûr Süleyman Beşe ile tâife-i merkūmenin zimmetlerini ibrâ-i âmm ile ibrâ ve ıskāt edip ve ba‘de’l-yevm kendi mâlımdan olup tâife-i merkūmenin nizâmlarına mugāyir vaz‘ u hareket eylememek üzere ta‘ahhüd ve iltizâm eylediğimde tâife-i merkūme dahi ben kemâ fi’l-evvel Galata’da murâd eylediğim mahalde bir halatcı dükkânı açıp ve şâkird alıp ve şâkirdimi hendeğe koyup işletdiğimde taraflarından kat‘an dahl u ta‘arruz ve mümâna‘at olunmayıp ve zikr olunan otuz sekiz aded halat demirlerinden hendekde mevcûd olanları bana teslîm olunup ve destgâh gediklerinden biri mahlûl oldukda âhara verilmeyip bana verilmek üzere her biri ta‘ahhüd ve iltizâm eylediler dedikde tâife-i merkūmeden her biri dahi mezbûr Ali Reis’i ikrâr-ı meşrûhunda vicâhen ve şifâhen tahkīk ve tasdîk etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Cemâziyelâhir li-sene 1137. Şuhûdü’l-hâl: Arusi Mustafa Efendi, Ahmed Efendi kâtib, Mustafa Efendi kâtib, Molla İbrahim el-mukayyid, Ali b. Ahmed, Sırmakeş Mustafa.