Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 77 Hüküm no: 35 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazer v. Kirkor’un varislerinin menzil hisselerini Bogos’a sattıkları Fi’l-asl vilâyet-i Anadolu’da Divriği kazâsına tâbi‘Simara [Zimara] nâm karye ahâlîsinden olup mahrûse-i Galata’da Bereketzâde mahallesinde mütemekkin iken bundan akdem Kudüs-i Şerif’e azîmeti esnâsında garîkan hâlik olan Hazer v. Kirkor v. Ağya nâm Ermeni’nin verâseti li-ebeveyn er karındaşları Bogos ve Nikos ve Samak nâm Ermenilere ve hâlen karye-i mezbûrede sâkineler olan anası Ezbahar bt. Agut v. Harabet ve li-ebeveyn karındaşları Kudret ve Margarit nâm Ermeniyelere münhasıra ve tashîh-i meseleleri bi-hükmi’l-ferâiz kırk sekiz sehimden mu‘teber olup sihâm-ı mezbûreden sekiz sehmi mezbûre Ezbahar’a ve onar sehmi mezbûrûn Bogos ve Nikos ve Sahak’dan her birine ve beşer sehmi mezbûretân Kudret ve Margarit’den her birine isâbet eylediği ve hâlik-i mezbûrun terekesinden olup mahalle-i mezbûrede vâki‘ bir tarafdan Fidan nâm Ermeni menzili ve bir tarafdan Timur Zayi nâm Ermeni menzili ve taraf-ı sâlisden merkūm Fidan bahçesi ve ba‘zen Hobyar nâm Ermeni bahçesi ve taraf-ı râbi‘den tarîk-i âm ile mahdûd tabaka-i ulyâda bir bâb oda ve iki sofa ve matbahı ve fevkinde cihân-nümâyı ve vüstâda iki bâb oda ve bir matbahı ve süflâda iki mahtab ve sahrınc ve bi’r-i mâ ve kenîf ve bir mikdâr havluyu müştemil mülk menzilin el-yevm kıymet-i şer‘iyyesi zeyl-i kitâbda mektûbü’l-esâmî bî-garaz ehl-i vukūf takvîm ve tahmîniyle yüz yirmi bin akçe olmağla tashîh-i mezbûr üzere meblağ-ı merkūmdan yirmi bin akçesi mezbûre Ezbahar’a ve yirmi beşer bin akçesi mezbûrûn Bogos ve Nikos ve Sahak’dan her birine ve on ikişer bin yüz akçesi mezbûretân Kudret ve Margarit’den her birine isâbet ve intikāl eylediği lede’ş-şer‘i’l-enver zâhir ve mütebeyyin oldukdan sonra mezbûre Bogos meclis-i şer‘de işbu hâmilü’r-rakīm merkūm Bogos muvâcehesinde üzerine da‘vâ ve takrîr-i kelâm edip gāibât-ı mezbûrât Ezbahar ve Kudret ve Margarit menzil-i mahdûd-ı mezbûr ile hâlik-i mersûm Hazer’in tereke-i sâiresinden tashîh-i mezbûr üzere kendülere isâbet eden on sekiz sehm hisse-i şâyi‘alarını âhara bey‘a ve semenlerini ahz u kabza ve kendülere îsâle ve umûr-ı mezkûra mütevakkıfa olduğu husûsların küllîsine her biri taraflarından kabûlüme mevkūfe vekâlet ile vekîl nasb ve ta‘yîn eylediklerinden sonra gāibât-ı merkūmâtın vech-i muharrer üzere beni tevkîlleri bu tarafda bana teblîğ ve i‘lâm olundukda ben dahi ber-vech-i muharrer vekâlet-i merkūmeyi kabûl ve hıdemât-ı lâzımesini kemâ yenbağī ikāmete ta‘ahhüd eylediğim cihetle ben menzil-i mahdûd-ı mezbûrdan tashîh-i mezbûr üzere bana isâbet eden on sehm hisse-i şâyi‘amı asâleten yirmi beş bin akçeye ve gāibât-ı mezbûrâtın dahi kezâlik menzil-i mezbûrda olan on sekiz sehm hisse-i şâyi‘alarını vekâlet-i meşrûham hasebiyle cem‘an kırk beş bin akçeye merkūm Bogos’a bâten bey‘ u teslîm eylediğimde ol dahi ba‘de’l-iştirâ ve’t-tesellüm ve’l-kabûl kendi hisse-i şâyi‘amın semeni olan yirmi beş bin akçeyi merkūm Bogos yedinden bi’l-asâle ahz u kabz ve zikr olunan on sehm hisse-i şâyi‘ama müte‘allika âmme-i da‘vâdan merkūm Bogos’un zimmetini ibrâ ve ıskāt edip gāibât-ı mezbûrâtın sihâm-ı mezbûre semeninden hisselerine isâbet [eden] meblağ-ı mezbûr [kırk]beş bin akçeyi dahi mezbûr Bogos’dan bi’l-vekâle ahz murâd eylediğimde vermede ta‘allül eder suâl olunup edâya tenbîh olunması matlûbumdur dedikde gıbbe’s-suâl merkūm Bogos cevâbında fi’l-vâki‘hâl bi’l-cümle mezbûr Bogos’un takrîr-i meşrûhu üzere olduğunu ikrâr lâkin mezbûr Bogos’un gāibât-ı mezbûrât taraflarından ber-vech-i tafsîl vekâletini inkâr edicek müdde‘î-i mezbûrdan müdde‘âsını mübeyyin beyyine taleb olundukda gāibât-ı mezbûrâtın [5a] şahıslarını ma‘rifet-i şer‘iyye ile ârifân olan udûl-i ahrâr-ı ricâl-i Müslimînden ve zikr olunan Divriği kazâsı ahâlîsinden olup hâlâ mahmiye-i İstanbul’da ber-vech-i müsâferet sâkin Eyüb Sipahi b. Mehmed ve Ömer Sipahi b. İsa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ hâlik-i mezbûr Hazer v. Kirkor v. Ağya’nın ber-vech-i muharrer hâlâ Zimara karyesinde sâkineler olan anası mezbûre Ezbahar bt. Agut v. Harabet ve li-ebeveyn karındaşları mezbûretân Kudret ve Margarit ibnetey Kirkor v. Ağya mûrisleri hâlik-i merkūm Hazer’in terekesinden olup Galata’da Bereketzâde mahallesinde vâki‘ hudûd-ı müştemilâtı bâlâda zikr u beyân olan mülk menzil ile tereke-i sâiresinden tashîh-i mezbûr üzere kendülere isâbet eden on sekiz sehm hisse-i irsiyye-i şâyi‘alarını âhara bey‘ ve semenlerini ahz u kabz ve kendülere îsâle ve umûr-ı mezkûra mütevakkıfa olduğu husûsların küllîsine her biri taraflarından işbu merkūm Bogos’u bizim huzûrumuzda kabûlüne mevkūfe vekâlet ile vekîl nasb ve ta‘yîn etmeleriyle biz dahi gāibât-ı merkūmâtın vech-i muharrer üzere tevkîllerini bu tarafa gelip mersûm Bogos’a teblîğ ve i‘lâm eylediğimizde ol dahi vekâlet-i merkūmeyi kabûl ve hıdemât-ı lâzıme[yi] mahallinde ikāmete ta‘ahhüd eyledi biz bu husûsa bu vecih üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Bogos’un gāibât-ı mezbûrât taraflarından vekâlet-i mahkiyesine hüküm olunup ve semen-i mezbûr kırk beş bin akçeyi vekîl-i mezbûra edâ ve teslîme merkūm Bogos’a tenbîh olundukdan sonra yine mezbûr Bogos meclis-i mezkûrda merkūm Bogos muvâcehesinde bi’l-vekâle ikrâr ve takrîr-i kelâm edip ânifen teslîmine tenbîh-i şer‘î lâhik olan meblağ-ı mezbûr kırk beş bin akçeyi mezbûr Bogos yedinden bi’l-vekâle tamâmen alıp kabz eyledim ba‘de’l-yevm menzil-i mahdûd-ı merkūmun otuz sekiz sehm-i şâyi‘i mezbûr Bogos’un irsen ve şirâen mâlı ve mülküdür keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a bi’l-ibtigā ketb olundu. Fi’l-yevmi’l-ışrîn min-Cemâziyelâhir li-sene seb‘a ve selâsîn ve mi’e ve elf. Şuhûdü’l-hâl: Serbölük İbrahim Çelebi, Serbölük Halil Çelebi, Duhânî Mehmed Çelebi, Manav Abdurrahman Çelebi, Manav es-Seyyid Hüseyin Çelebi, Veli Çavuş, Hasan Çelebi Çukadâr, Muhzır Ali Bey, Bursalı Mehmed Muhzır.