Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 79 Hüküm no: 36 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Osman’ın menzilini Mehmed b. Hüseyin’e sattığı Mahrûse-i Galata’da Emekyemez mahallesinde sâkin Ali Beşe b. Osman nâm kimesne meclis-i şer‘de işbu râfi‘u’l-vesîka Mehmed b. Hüseyin nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm olup mahalle-i mezbûre[de] vâki‘ bir tarafdan Demirci veresesi mülkü ve bir tarafdan Rabia Hâtun mülkü ve bir tarafdan Dellâl Osman mülkü ve bir tarafdan tarîk-i âm ile mahdûd fevkānî bir bâb oda ve tahtânî bir bâb ( ) ve kenîf ve bir mikdâr havluyu müştemil mülk menzilimi cemî‘ tevâbi‘ ve levâhıkı ve kâffe-i menâfi‘ ve merâfıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed’e yüz elli guruşa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz elli guruşu müşterî-i mezbûr yedinden tamâmen alıp kaz eyledim ba‘de’l-yevm menzil-i mahdûd-ı mezkûr bi-cümletin mâ yeştemilehû ve yahvîhi müşterî-i merkūmun mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâmin ve’l-ışrîn min-Cemâziyelâhir li-sene seb‘a ve selâsîn ve mi’e ve elf. Şuhûdü’l-hâl: el-Hâc Mehmed b. İbrahim, Mehmed b. el-Hâc Kadri, Halil Çelebi b. Mustafa, Molla Mehmed b. Yusuf, Ali b. Abdullah, Ali b. Ahmed ve gayrühum.