Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 80 Hüküm no: 37 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe b. Ebubekir’in Hasan Beşe b. Ali’den eşya satın almaktan vaz geçtiği Çevren tâifesinden Hasan Beşe b. Ebûbekir nâm kimesne meclis-i şer‘-i hatîr-i lâzimü’t-tevkīrde işbu râfi‘u’l-kitâb diğer Hasan Beşe b. Ali nâm kimesne mahzarında ikrâr ve takrîr-i kelâm edip mezbûr diğer Hasan Beşe’nin taht-ı icâresinde olup mahrûse-i Galata’da Kara Mustafa Paşa mahallesinde vâki‘ bir bâb Çevren ve kebâb ve hoşâbcı dükkânı derûnunda mevcûd olup yedinde mülkü olan üçü kapaksız mâ‘adâsı kapaklı on yedi bakır tas ve kapaklı üç bakır bâdiye ve bir kazgan ve iki tencere ve bir kefkir ve bir kefce ve iki tâbe ve yedi stil ve yüz otuz demir kebâb şişi ve bir kanca ve bir demir kefce vesâir âlât-ı lâzımesinin nısfını mezbûr diğer Hasan Beşe târih-i kitâbdan üç ay mukaddem bey‘-i kat‘î ile bana kırk iki guruşa bey‘ u teslîm ben dahi ba‘de’l-iştirâ ve’t-teslîm semeni olan meblağ-ı mezbûrun yirmi üç guruşunu yedimden alıp kabz eyleyip bâkī kalan on dokuz guruşu alâ-mehlin ahz u istîfâya ta‘ahhüd eylemiş idi el-hâletü hâzihî bizim rızâmız ile beynimizde bey‘-i merkūmu ikāle ve her birimiz redd-i mebî‘ ve kabz-ı semen eylediğimizden sonra mezbûr diğer Hasan Beşe mâlımdan dükkân-ı merkūma ba‘zı masrûfum için bana sekiz buçuk guruş dahi verip ben dahi yedinden ahz u kabz ve şirket-i merkūmeye ve meblağ-ı mezbûr sekiz buçuk guruşa vesâire müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîk mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Cemâziyelâhir li-sene seb‘a ve selâsîn ve mi’e ve elf. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim Çelebi b. Mustafa, Mustafa Beşe b. Receb.