Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 80 Hüküm no: 38 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Abdullah b. Abdülkerim’in vasiyeti Mahrûse-i Galata’da Şehsuvar mahallesinde sâkin el-Hâc Abdullah b. Abdülkerîm nâm kimesne meclis-i şer‘de zikri âtî vasâyâsını tenfîze vasiyy-i muhtâr nasb ve ihtiyâr eylediği işbu râfi‘u’l-kitâb Ahmed Çelebi b. Mehmed nâm kimesne mahzarında ikrâr ve takrîr-i kelâm edip ben bi-emri’llâhi te‘âlâ dâr-ı fenâdan sarây-ı bekāya intikāl ve irtihâl eylediğimde mecmû‘ mâlımın sülüsü ifrâz olunup ve sülüs-i mezbûrdan üç bin akçesi techîz ve tekfinime ve bin beş yüz akçesi ıskāt ve salât ve sıyâmıma ve iki bin dört yüz akçesi abd-i müdebbirim Hasan’a ve iki bin dört yüz akçesi vasiyy-i mezbûr Ahmed Çelebi’ye ücret verilip fazla kalırsa Mushaf-ı şerîf alınıp müstehak olan kimesnelere verile deyü vasıyyet ve vesâya-yı merkūmemi tenfîze mezbûr Ahmed Çelebi’yi vasiyy-i muhtâr nasb ve ihtiyâr eyledim dedikde mezbûr Ahmed Çelebi dahi ber-vech-i muharrer vesayet-i mezbûreyi kabûl ve mahallinde hizmet-i lâzımesini ikāmete ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Recebi’l-ferd li-sene 1137. Şuhûdü’l-hâl: Arabzâde el-Hâc Ali, Yelkenci Kara Hasan, Kara el-Hâc Hasan, el-Hâc Ali b. Abdullah, el-Hâc Süleyman b. Hasan, Mahmud Çelebi b. el-Hâc Mahmud, Ahmed Ağa b. Mehmed, Mustafa Çelebi b. Ahmed, Ebûbekir Çelebi b. Ahmed.