Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 81 Hüküm no: 39 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hallac Osman b. Abdullah’ın varislerinden Emetullâh bt. Hüseyin’in kocası, kızları ve damatlarıyla alacak davasında sulh oldukları
Mahmiye-i İstanbul’da Unkapanı kapısı dâhilinde sâkin iken bundan akdem vefât eden Hallac Osman b. Abdullah nâm kimesnenin verâseti zevc-i metrûkesi Emetullâh bt. Hüseyin ve sulbiye kebîre kızları Hadice ve Rukiye hâtunlara münhasıra olduğu lede’ş-şer‘i’l-enver zâhir ve mukarrer oldukdan sonra mezbûre Emetullâh Hâtun zâtı ba‘de’t-ta‘rîfi’ş-şer‘î mahfil-i şer‘de sadriye kebîre kızları mezbûre Hadice Hâtun’un zevci ve tarafından husûs-ı âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân es-Seyyid Ali Çelebi b. es-Seyyid Bekir ve Abdullah Beşe b. Şa‘ban nâm kimesneler şehâdetleriyle sâbit olan es-Seyyid Mustafa Çelebi b. es-Seyyid Ali ve mezbûre Rukiye Hâtun’un kezâlik zevci ve tarafından husûs-ı âti’l-beyâna vekîli olduğu mezbûrenin zâtını ma‘rifet-i şer‘iyye ile ârifân el-Hâc İbrahim b. Hasan ve Süleyman Çelebi b. Abdullah nâm kimesneler şehâdetleriyle sâbit olan el-Hâc Mustafa b. Süleyman nâm kimesneler mahzarlarında bi-tav‘ihâ ikrâr ve takrîr-i kelâm edip zevcim müteveffâ-yı mezbûr zimmetinde mütekarrır ve ma‘kūdün-aleyh olan elli guruş mehr-i mü’eccelim ve cihet-i karz-ı şer‘îden dahi elli guruş ki cem‘an yüz guruş hakkım olup müteveffâ-yı mezbûrun yedinde olan terekesi kalîl olmağla deyn-i mezkûruna vefâ etmeyip müvekkiletân-ı merkūmetân zevcim mezbûrun ile’l-vefât îcâreteyn-i mezbûreteyn ile taht-ı tasarrufunda olup ba‘de vefâtihî intikāl-i âdî ile kendülere intikāl eden vakıf hallâc dükkânı derûnunda olan bir tokmak ve bir hallâc yayı ve âlât-ı sâiresini âhara bey‘ murâd eylediklerinde ben dahi hakkım olan meblağ-ı mezbûr yüz guruşu âlât-ı mezbûre semenlerinden ahz u istîfâ ederim deyü da‘vâ eylediğimizde beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip da‘vâ-yı mezkûrumdan kızlarım müvekkiletân-ı merkūmetân ile beni yirmi guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yirmi guruşu kızlarım müvekkiletân-ı merkūmetân taraflarından dâmâdlarım vekîlân-ı mezbûrân yedlerinden tamâmen ahz u kabz eylediğimden sonra zevcim müteveffâ-yı mezbûr ile iştirâken tasarrufumuzda olan vakıf menzilden mâ‘adâ zevcim müteveffâ-yı mezbûrun kalîl ve kesîr terekesine ve dükkân-ı mezbûr âlâtına müte‘allika âmme-i de‘âvî ve mutâlebât ve eymân ve muhâsamâtdan kızlarım müvekkiletân-ı mezbûretân ile dâmâdlarım vekîlân-ı mezbûrânın zimmetlerini ibrâ-yı âmm-ı kātı‘u’n-nizâ‘la ibrâ ve ıskāt eylediğimde onlar dahi bedel-i sulh-i mezbûr yirmi guruşa müte‘allika da‘vâdan benim zimmetimi ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu.
Fi’l-yevmi’r-râbi‘ ve’l-ışrîn min-Cemâziyelâhir li-sene 1137.
Şuhûdü’l-hâl: Abdullah Beşe b. Şa‘ban, es-Seyyid Ali Çelebi b. es-Seyyid Bekir, el-Hâc İbrahim b. Hasan, Süleyman Çelebi b. Abdullah, İbrahim b. Muharrem, Halil b. Mustafa.
|