Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 82 Hüküm no: 41 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın Ahmed Çelebi b. Abdullah’a borcunu taksitlendirdiği Mahrûse-i Galata muzâfâtından kasaba-i Tophane’de Firuzağa mahallesinde sâkin Mehmed b. Mustafa nâm kimesne meclis-i şer‘de kitâbcı tâifesinden işbu râfi‘u’l-kitâb Ahmed Çelebi b. Abdullah nâm kimesne mahzarında ikrâr ve takrîr-i kelâm edip mezbûr Ahmed Çelebi’ye bir sene mukaddem iştirâ ve kabz eylediğim on yedi kantar kırk dört litre hınnâ bahâsından zimmetimde kırk üç buçuk guruş deynim olup meblağ-ı mezbûru def‘aten edâya iktidârım olmayıp taksît ile edâya tâlib olduğumda mezbûr Ahmed Çelebi dahi beher şehr kendüye bir buçuk guruş vermek üzere târih-i kitâbdan yirmi dokuz ay tamâmına değin beni taksît ve te’cîl eyledikde ben dahi ber-vech-i muharrer taksît-i mezbûru kabûl ve meblağ-ı mezbûru mâh be-mâh mezbûr Ahmed Çelebi’ye edâya ta‘ahhüd eyledim dedikde gıbbe’t-tasdîki’ş-şer‘î mezbûr Mehmed’in zevcesi Meryem bt. Şa‘ban nâm hâtun zâtı ba‘de’t-ta‘rîfi’ş-şer‘î meclis-i mezbûrda mezbûr Ahmed Çelebi mahzarında ikrâr ve takrîr-i kelâm edip ben dahi meblağ-ı mukassıt-ı mezbûra tarafeynden emr u kabûlü hâviye kefâlet-i sahîha-i şer‘iyye ile kefîl ve dāmin oldum dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Cemâziyelâhir li-sene 1137. Şuhûdü’l-hâl: Mustafa Reis b. Mehmed, Hüseyin Reis b. Mehmed, Süleyman Çelebi b. Mehmed, Ahmed Beşe b. Ali hınnacı, İbrahim b. Muharrem, Halil b. Mustafa.