Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 83 Hüküm no: 43 Orijinal metin no: [5b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Ağna v. Denik’in tasarrufundaki vakıf menzilini Mankasar v. Madros’a bedeli mukabelesinde terk ettiği Mahrûse-i Galata’da Sultan Bayezid mahallesinde sâkin Kirkor v. Ağna v. Denik nâm şâbb-ı emred meclis-i şer‘de işbu râfi‘u’r-rakīm Mankasar v. Madros nâm Ermeni muvâcehesinde ikrâr ve takrîr-i kelâm edip merhûm İsmail Efendi nâm sâhibü’l-hayrın evkāfı müstagallâtından olup mahrûsa-i mezbûre hâricinde Hüseyin Ağa mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât icâre-i mu‘accele-i ma‘lûme ve ayda yedi buçuk akçe icâre-i mü’eccele ile taht-ı tasarrufumuzda olan vakıf menzilimi ma‘rifet-i mütevellî ile merkūm Mankasar’a iki yüz on guruş bedel mukābelesinde ferâğ ve tefvîz edip ol dahi ber-vech-i muharrer tefevvüz ve kabûl eyledikden sonra bedel-i mezbûr iki yüz on guruşu merkūm Mankasar yedinden tamâmen ahz u kabz eylediğimden sonra menzil-i mevkūf-ı mezbûra ve bedeline müte‘allika âmme-i da‘vâdan merkūm Mankasar ile hâl-i sıgārımda vasîm olan işbu hâzır bi’l-meclis Kirkor v. Yadigar nâm Ermeninin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde merkūm Mankasar dahi menzil-i mevkūf-ı mezbûrun istîfâsına müte‘allika âmme-i da‘vâdan benim zimmetimi ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Cemâziyelâhir li-sene 1137. Şuhûdü’l-hâl: el-Hâc Mehmed b. Abdullah, es-Seyyid Ali Ağa b. Hasan, Ali Çelebi b. Hasan, Halil Çelebi b. Mustafa, Mustafa b. Ahmed.