Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 88 Hüküm no: 49 Orijinal metin no: [6a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın eniştesi Yusuf Ağa b. Ahmed’den alacak davasının reddedildiği Mahrûse-i Galata hâricinde Kalafatcıbaşı mahallesinde sâkin iken bundan akdem vefât eden Nasuh b. Abdullah’ın verâseti zevce-i metrûkesi Saime bt. Sefer nâm hâtuna ve sulbî sagīr oğlu Mehmed ile hîn-i vefâtında sagīr olup hâlâ bulûğunu iddi‘â eden Mustafa’ya ve sulbiye kebîre kızı Meryem nâm hâtuna münhasıra olduğu şer‘an zâhir ve mukarrer oldukdan sonra sin ve cüssesinin bulûğa tahammülü olup bulûğunu mu‘terif olan mezbûr Mustafa meclis-i şer‘de eniştesi işbu râfi‘u’l-kitâb Yusuf Ağa b. Ahmed nâm kimesne mahzarında üzerine da‘vâ ve takrîr-i kelâm edip babam müteveffâ-yı mezbûrdan bana intikāl eden doksan guruşumu târih-i kitâbdan sekiz sene mukaddem hâl-i sugurumda vasîm olan anam Saime Hâtun kendi menzilinde eniştem mezbûr Yusuf Ağa’ya ikrâz ve teslîm edip ol dahi ber-vech-i muharrer iktirâz etmeğin hâlâ mezbûr Yusuf Ağa’dan suâl olunup meblağ-ı mezbûru bana teslîme tenbîh-i şer‘î olunmak matlûbumdur dedikde gıbbe’s-suâl ve akībü’l-inkâr müdde‘î-i mezbûrdan ber-vech-i muharrer müdde‘âsını mübeyyin beyyine taleb olundukda isbât-ı beyyineden izhâr-ı acz ile isre’l-istihlâf ve ba‘de’l-halefi’ş-şer‘î mûcebiyle müdde‘î-i mezbûr Mustafa bilâ vech-i şer‘î mezbûr Yusuf Ağa’ya mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fî 5 Receb sene 1137. Şuhûdü’l-hâl: Ali b. Ahmed, Mehmed b. Ahmed, Mustafa b. Receb, Mustafa b. Ahmed, İbrahim b. Mustafa, Halil b. Mustafa, İbrahim b. Muharrem.