Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 88 Hüküm no: 50 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Hüseyin’in oğlu Ali’nin Halil Efendi b. Mustafa’da olan hissesini tahsil ettiği El-emru hasbemâ hurrire fîhi nemakahü’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira lehû-. Medîne-i Üsküdar’da Kefce mahallesinde sâkin iken bundan akdem vefât eden İbrahim b. Hüseyin b. Abdullah’ın verâseti zevce-i metrûkesi Emine bt. Abdullah nâm hâtun ile hîn-i vefâtında sagīr olup hâlâ kebîr olan sulbî oğlu Ali nâm kimesneye münhasıra olduğu lede’ş-şer‘i’l-enver zâhir ve mütekarrır oldukdan sonra sin ve cüssesinin bulûğa tahammülü ve bâliğ ve reşîd olup mâlını tasarrufa kādir olduğu Halil Çelebi b. Ali ve Mehmed Çelebi b. Mustafa nâm kimesneler ihbârlarıyla zâhir olan mezbûr Ali meclis-i şer‘de mezbûr Ali’nin anası olup tesviye-i umûrunu rü’yete vasiyy-i mansûbu olan mezbûre Emine Hâtun üzerine kıbel-i şer‘den nâzır nasb olunan işbu râfi‘u’l-kitâb Halil Efendi b. Mustafa nâm kimesne mahzarında ikrâr ve takrîr-i kelâm edip ber mûceb-i defter babam müteveffâ-yı mezbûrdan bana intikāl eden doksan altı guruş otuz bir para mukaddemâ mezbûr Halil Efendi ma‘rifetiyle Galata bezzazistanına vaz‘ olunmuş idi hâlâ ben âkıl ve bâliğ ve mâlımı tasarrufuma kādir olduğum cihetle mezbûr Halil Efendi meblağ-ı mezbûru bana def‘ u teslîm edip ben dahi yedinden tamâmen ahz u kabz eyledim binâen aleyh meblağ-ı mezbûrdan mezbûr Halil Efendi zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis ve’l-ışrîn min-Cemâziyelâhir li-sene 1137. Şuhûdü’l-hâl: Halil Çelebi b. Ali, İbrahim Çelebi b. Muharrem, Mehmed Çelebi b. Mustafa, İbrahim Çelebi b. Mustafa, Ali Çelebi b. Ahmed, Mehmed Çelebi b. Ahmed, Mustafa Çelebi b. Ahmed.