Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 89 Hüküm no: 51 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belgradizade el-Hâc Mustafa b. Ali’nin zevcesi İstemihan bt. Mahmud’un hissesini ve alacaklarını oğlu el-Hâc Osman’dan tahsil ettiği Mahrûse-i Galata muzâfâtından kasaba-i Tophane’de Süheyl Bey mahallesinde sâkin iken bundan akdem vefât eden Belgradîzâde el-Hâc Mustafa b. Ali nâm kimesnenin verâseti zevce-i metrûkesi İstemihan bt. Mahmud nâm hâtuna ve sulbî kebîr oğulları el-Hâc Osman ve el-Hâc Ali nâm kimesnelere münhasıra ve tashîh-i meselesini bi-hükmi’l-ferâiz on altı sehimden olmağla sihâm-ı mezbûreden iki sehmi mezbûre İstemihan’a ve yedişer sehmi mezbûrân el-Hâc Osman ve el-Hâc Ali’den her birine isâbet eylediği lede’ş-şer‘i’l-enver zâhir ve mukarrer oldukdan sonra mezbûre İstemihan bt. Mahmud b. Seydi tarafından ikrâr-ı âti’z-zikre vekîli olduğu zât-ı mezbûreyi ma‘rifet-i şer‘iyye ile ârifân mahalle-i mezbûre sükkânından Ali Yazıcı b. Abdullah ve Ahmed Çelebi b. Ali nâm kimesneler şehâdetleriyle sâbit olan el-Hâc Ali b. Ahmed nâm kimesne meclis-i şer‘de tereke-i müteveffâ-yı mezbûre bi’l-verâse vâzı‘u’l-yed olup kendi tarafından asîl ve karındaşı mezbûr el-Hâc Ali tarafından ibrâ-yı câi’z-zikri tasdîka sâbitü’l-vekâle vekîl olan işbu râfi‘u’l-kitâb mezbûr el-Hâc Osman mahzarında bi’l-vekâle ikrâr ve takrîr-i kelâm edip müvekkilem mezbûre İstemihan Hâtun zevci müteveffâ-yı mezbûr el-Hâc Mustafa zimmetinde mütekarrır ve ma‘kūdün-aleyh olan elli guruş mehr-i mü’eccel hakkı ile mecmû‘ terekesinden tashîh-i mezbûr üzere iki sehm hisse-i irsiyyesine isâbet eden üç yüz guruş ki cem‘an üç yüz elli guruşu mezkûr el-Hâc Osman yedinden bi’t-tamâm ve’l-kemâl ahz u kabz eylediğinden sonra müteveffâ-yı mezbûrun kalîl ve kesîr terekesinden iki sehm hisse-i irsiyyesine müte‘allika âmme-i de‘âvî ve mutâlebât ve eymân ve muhâsamatdan mezbûr el-Hâc Osman ile karındaşı müvekkil-i mezbûr el-Hâc Ali’nin zimmetlerini ibrâ-yı âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-gurre-i Recebi’l-ferd li-sene 1137. Şuhûdü’l-hâl: Ömer Dede b. Receb, Mehmed Çelebi b. el-Hâc Mustafa, İbrahim Yazıcı b. Mehmed, el-Hâc Mustafa b. Mehmed Korak, el-Hâc Mustafa b. Mehmed el-imâmzade, İbrahim b. Muharrem, Halil b. Mustafa.