Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 90 Hüküm no: 52 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şîrugancı Mustafa Çelebi b. Mehmed’in vârislerinden Afife Hatun’un Helvacı Ahmed Çelebi b. Mehmed’den alacaklarını tahsil ettiği Mahrûse-i Galata’da Câmi‘-i Kebîr mahallesinde sâkin iken bundan akdem vefât eden Şîrugancı Mustafa Çelebi b. Mehmed nâm kimesnenin verâseti zevce-i metrûkesi Emine bt. Receb nâm hâtuna ve sulbî sagīr oğlu Ahmed ve sulbiye sagīre kızları Afife ve Havva’ya münhasıra olup ba‘dehû sagīr-i mezbûr Ahmed dahi vefât edip verâseti anası mezbûre Ümmühâni Hâtun’a ve li-ebeveyn kız karındaşları mezbûretân Afife ve Havva’ya münhasıra ve tashîh-i mes’eleleri li-hükmi’l-münâsahati’ş-şer‘iyye yüz altmış sehimden olup sihâm-ı mezbûreden otuz dört sehmi merkūme Emin Hâtun’a ve altmış üçer sehmi merkūmetân Afife ve Havva’dan her birine isâbeti tahakkukundan sonra sin ve cüssesinin hadd-i bulûğa tahammülü olduğundan mâ‘adâ bulûğunu mu‘terife olup reşîde ve âkıle ve mâlını tasarrufa kādire olduğu Ahmed Çelebi b. Receb ve Ahmed Beşe b. İskender nâm kimesneler ile zeyl-i kitâbda muharrerü’l-esâmî Müslimîn ihbârlarıyla lede’ş-şer‘i’l-enver zâhir olan mezbûre Afife Hâtun meclis-i şer‘de hâlâ sugurunda tesviye-i emrini rü’yete kıbel-i şer‘den mansûb vasîsi olan işbu râfi‘u’l-kitâb Helvacı Ahmed Çelebi b. Mehmed nâm kimesne mahzarında bi-tav‘ihâ ikrâr ve takrîr-i kelâm edip hâlâ ben âkıle ve bâliğa ve reşîde olup mâlımı tasarrufuma kādire olduğum cihetle vasîm mezbûr Ahmed Çelebi mûrislerim müteveffâ-yı mezbûrânın terekelerinden ber mûceb-i defter-i kassâm nakden bi’l-vesaye makbûzu olan yedi bin sekiz yüz yetmiş akçe ile yine müteveffiyân-ı mezbûrânın terekelerinden olup mahalle-i mezbûrede vâki‘ verese-i mezbûre ile ma‘an sâkine olduğumuz mülk menzil ve isti‘mâl eylediğimiz ma‘lûmü’l-mikdâr evânî-i nühâsiye ve yağhâne âlâtından tashîh-i mezbûr üzere bana isâbet eden yüz altmış sehimden altmış üç sehm hisse-i irsiyyemi bana def‘ u teslîm ben dahi vech-i muharrer yedinden tamâmen ahz u kabz eylediğimden sonra meblağ-ı mezbûra ve nühâsiye ve müteveffiyân-ı mezbûrânın kalîl ü kesîr ve celîl ü hakīr tereke-i sâirelerine müte‘allika âmme-i de‘âvî ve mutâlebât ve eymân ve muhâsamâtdan vasiyy-i mezbûr Ahmed Çelebi’nin zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Cemâziyelâhir li-sene 1137. Şuhûdü’l-hâl: Mustafa Çelebi b. Ahmed, el-Hâc İbrahim b. Mustafa, Abdullah Beşe b. Mahmud, Mehmed b. Ahmed, Mustafa b. Receb, Süleyman b. Ahmed, Ali b. Ahmed.