Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 91 Hüküm no: 53 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Simon’un ortağı Praşko v. Toma aleyhine aldığı hüccetle amel edilmemesi Mahrûse-i Galata[da] Balıkpazarı’nda sâkin balıkcı tâifesinden Yorgi v. Simon nâm zimmî meclis-i şer‘de yine tâife-i merkūmeden işbu hâmilü’r-rakīm Praşkova v. Toma nâm zimmî muvâcehesinde ikrâr ve takrîr-i kelâm edip hâlâ merkūm Praşkova ile ma‘an sâkin olduğumuz mahrûse-i merkūme Balıkpazarı’nda vâki‘ balıkcı dükkânının mukaddemâ hâlik olan babam merkūm Simon vaktinden beri otuz seneden mütecâviz nısf gediği benim ve nısf gediği merkūm Praşkova’nın iken ben merkūmu ta‘cîz ve dükkân-ı mezbûrun mecmû‘ gediği benim olmak üzere nizâm-ı kadîmimize ve ustalarımızın reʼylerine mugāyir yedime hüccet alıp merkūm Praşkova’yı dükkân-ı mezbûrdan ihrâc murâd eylediğim cihetle merkūm Praşkova ve kebîr oğulları İstavranos ve Toma nâm zimmîler ile beynimizde husûmet ve nizâ‘ teşâtüm ve tedârüb vukū‘undan nâşî tâife-i merkūmenin kethudâ vesâir ustaları dahi benden teşekkî üzere olmuşlar idi el-hâletü hâzihî biz tasaddî eylediğimiz darb da‘vâsından rızâmız ile ferâğ eyledik ba‘de’l-yevm dükkân-ı merkūmun kemâ fi’l-evvel nısf gediği benim ve nısf gediği merkūm Praşkova’nın olmak üzere tasarruf ve birbirimizin gediğine müdâhale eylemeyip ve yedinde olan hüccet-i mezbûr ile amel olunmaya dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Cemâziyelâhir li-sene 1137. Şuhûdü’l-hâl: Süleyman Efendi b. Osman, Ahmed Efendi b. Süleyman, İbrahim b. Muharrem, Halil Efendi b. Hüseyin, Mehmed b. Ahmed, İbrahim b. Mustafa, Mustafa Beşe b. Receb.