Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 91 Hüküm no: 54 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Abdullah’ın Mustafa Kapudan b. el-Hâc Ömer’den alacağını tahsil ettiği Mahrûse-i Galata muzâfâtından kasaba-i Beşiktaş’da Sinan Paşa mahallesinde sâkin Süleyman b. Abdullah nâm kimesne meclis-i şer‘de tüccâr kalyonu kapudanlarından Arab Ömeroğlu demeğle ma‘rûf Mustafa Kapudan b. el-Hâc Ömer b. Abdurrahman nâm kimesne tarafından ibrâ-i âti’z-zikri tasdîka vekîli olduğu es-Seyyid Ahmed Çelebi b. es-Seyyid Mehmed ve Mehmed b. Ahmed nâm kimesneler şehâdetleriyle sâbit olan işbu râfi‘u’l-kitâb Abdi Hoca b. Ali nâm kimesne mahzarında ikrâr ve takrîr-i kelâm edip müvekkil-i mezbûr Mustafa Kapudân’ın örf-i fellâhînde kalyon ta‘bîr olunur sefînesinde mellâh olduğum cihetle kapudan-ı mezbûrun sefînesinde ve kamarasında târih-i kitâba gelince yedi sene mütevâliyeten hizmet eylemiş idim el-hâletü hâzihî sinîn-i mezbûrede lâzım gelen kalîl ü kesîr ücret-i mellâhiyemi müvekkilim mezbûr Mustafa Kapudan yedinden tamâmen ahz u kabz eylediğimden sonra sinîn-i mezbûrede lâzım gelen ücretime ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvî ve mutâlebât ve eymân ve muhâsamâtdan müvekkil-i mezbûr Mustafa zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ min-Recebi’l-ferd li-sene 1137. Şuhûdü’l-hâl: el-Hâc Ali b. Mehmed, İbrahim Çelebi b. Veli, İbrahim Çelebi b. Davud, Mustafa Beşe b. Mustafa, Kahveci Ahmed b. Mehmed, İbrahim Çelebi b. Muharrem, Halil Çelebi b. Mustafa.