Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 93 Hüküm no: 56 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bolevîzâde es-Seyyid Mehmed Efendi’nin vârislerinin menzil davasında sulh oldukları El-emru hasbemâ nümika fîhi harrerehu’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira lehû-. Husûs-ı âti’z-zikrin mahallinde ketb u tahrîri iltimâs olunmağın savb-ı şer‘-i enverden mevlânâ Mustafa Efendi b. Hasan me’zûnen bi’l-ketb irsâl olunup ol dahi sâbıkā Bursa kādısı olan a‘lemü’l-ulemâi’l-izâm efdalü’l-fuzelâi’l-fihâm fazîletli Bolevîzâde es-Seyyid Mehmed Emin Efendi hazretlerinin mahrûse-i Galata a‘mâlinden kasaba-i Beşiktaş’da Sinan Paşa-yı Kebîr mahallesinde vâki‘ sâkin oldukları yalıya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mahrûse-i mezbûre muzâfâtından kasaba-i Tophane’de Karabaş Mustafa Ağa mahallesinde sâkine fahrü’l-muhadderât Fâtıma Hânım bt. Safiye Sultanzâde Mehmed Bey’in kebîr oğlu ve tarafından zikr-i âtî ibrâya vekîli olduğu zât-ı mezbûreyi ma‘rifet-i şer‘iyye ile ârifân Hammâmî Mustafa Çelebi b. el-Hâc Ömer ve İmâm el-Hâc Mustafa Efendi b. Mehmed nâm kimesneler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olan İbrahim Bey b. Hüseyin Bey meclis-i ma‘kūd-ı mezbûrda müvekkile-i mezbûre Fâtıma Hânım’ın li-eb er karındaşı olup silahşor-i şehriyârî umdetü’l-emâcid ve’l-ekârim câmi‘u’l-mehâmid ve’l-mekârim işbu râfi‘u’l-kitâb Abdullah Bey b. Safiye Sultanzâde Mehmed Bey zimmetinde bi’l-vekâle ikrâr ve takrîr-i kelâm edip anam müvekkile-i mezbûre Fâtıma Hânım babası müteveffâ-yı mezbûr Mehmed Bey’den müntakıl kasaba-i Beşiktaş’da Ekmekçibaşı mahallesinde vâki‘ bir tarafdan Esadzâde mülkü ve bir tarafdan Sarayî Rukiye Hâtun mülkü ve iki tarafdan tarîk-i âm ile mahdûd hâriciye ve dâhiliyede büyût-ı adîde ve bahçeyi müştemil mülk menzil ile Hâslar kazâsı muzâfâtından Silivri nâhiyesine tâbi‘ Yeniceler nâm karyede vâki‘ ma‘lûmü’l-hudûd çiftlik ta‘bîr olunur mülk menzil ve derûnunda mevcûd ma‘lûmü’l-aded devâb ve mevâşî vesâir çiftlik âlâtı ve Silivri kasabasında vâki‘ altı bâb harâb ve altı bâb ma‘mûr mahzenlerden ve ba‘dehû vefât eden li-ebin kız karındaşları Zeyneb ve Saliha nâm sagīrelerin emlâk-ı merkūmede olan hisse-i irsiyyelerinden ber mûceb-i defter-i kassâm bi-tarîki’l-münâsaha kendüye isâbet eden hisse-i şâyi‘a-i ma‘lûmesini müteveffâ-yı mezbûr Mehmed Bey’in terekesinden li-verâse vaz‘-ı yed eden karındaşı mûmâ-ileyh Abdullah Bey’den taleb ve da‘vâ sadedinde olduğu ecilden beynlerinde nizâ‘-ı kesîre vâkı‘a olmuş idi el-hâletü hâzihî beynimize muslihûn tavassut edip beni anam müvekkile-i mezbûre Fâtıma Hânım’a babası müteveffâ-yı mezbûr Mehmed Bey li-ebin kız karındaşları müteveffiyetân-ı mezbûretânın terekelerinden olan emlâk-ı merkūme ve eşyâ-yı sâireden kendüye isâbet eden hisse-i şâyi‘a-i ma‘lûmesi da‘vâsından mûmâ-ileyh Abdullah ile dört yüz kırk guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr dört yüz kırk guruşu işbu meclis-i şer‘de mûmâ-ileyh Abdullah Bey yedinden tamâmen vekâleten ahz u kabz eylediğimden sonra anam müvekkile-i mezbûrenin emlâk-ı mezbûrede olan hisse-i ma‘lûmesine ve taraf-ı Devlet-i aliyye’den ta‘yîn olunan müfettiş hissesinden anam müvekkile-i mezbûre Fâtıma Hânım’ın bu âna gelince bir akçe ve bir habbe makbûzu olmamağın maişet-i merkūmeye ve târih-i kitâba gelince beynlerinde cereyân eden sâir hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan bi’l-vekâle mûmâ-ileyh Abdullah Bey’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mûmâ-ileyh Abdullah Bey dahi meclis-i mezbûrda vekîl-i mezbûr İbrahim Bey ile eniştesi Hüseyin Bey b. Hasan mahzarında ikrâr ve takrîr-i kelâm edip ben dahi bedel-i sulh-i mezbûr dört yüz kırk guruşa ve kız karındaşım müvekkile-i mezbûre Fâtıma Hânım zevci mezbûr Hüseyin Bey ile ber mûceb-i temessük târih-i kitâba gelince beynimizde cereyân eden kalîl ü kesîr ve celîl ü hakīr ahz u i‘tâ ve mu‘âmelât-ı şettâdan hukūk-ı ma‘lûme ve mechûleye müte‘allika âmme-i de‘âvî ve mutâlebât ve eymân ve muhâsamâtdan karındaşım müvekkile-i mezbûre Fâtıma Hânım ile zevci mezbûr Hüseyin Bey ve vekîl-i mezbûr İbrahim Bey’in zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Hasan Ağa b. Mehmed ve Serbölük Halil Çelebi b. Mustafa ile meclis-i şer‘a gelip alâ vukū‘ihî inhâ ve takrîr etmeğin ma-vaka‘a li-ecli’t-tevsîk bi’l-ibtigā ketb u tenmîk olundu. Fi’l-yevmi’s-sâdis min-Recebi’l-ferd li-sene seb‘a ve selâsîn ve mi’e ve elf. Şuhûdü’l-hâl: Umdetü’l-mevâliyyi’l-izâm Bolevîzâde es-Seyyid Mehmed Emin Efendi, fahrü’l-emâsil ve’l-akrân Ebûbekir Bey b. Safiye Sultanzâde Mehmed Bey, Mahmud Efendi b. Mehmed, el-Hâc Hasan Ağa b. Mustafa, Mustafa Çelebi b. el-Hâc Ömer hammâmî, el-Hâc Ali b. Abdullah berber, Mustafa Ağa b. Mehmed, Ali Ağa b. Mustafa, Ahmed Çelebi b. Ali hammâmî, İbrahim Çelebi b. Süleyman cizyedar, İmâm el-Hâc Mustafa Efendi b. Mehmed, Mustafa Çelebi b. İbrahim.