Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 94 Hüküm no: 57 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in annesi İstemihan bt. Mehmed’den kendisine intikal eden hissesini Osman Efendi b. Mehmed’den tahsil ettiği Fi’l-asl vilâyet-i Rumeli’nde vâki‘ Va[r]na kasabası mahallâtından Debbâğhâne mahallesi sâkinelerinden olup bundan akdem sefîne ile mahmiye-i İstanbul’a gelirken esnâ-yı tarîkde Yedikumlar önünde garîkan vefât eden İstemihan bt. Mehmed b. Abdullah’ın verâseti sadrî kebîr oğlu ve hasren vârisi olduğunu iddi‘â eden Ali b. Mehmed nâm kimesne meclis-i şer‘de mahrûse-i Galata voyvodası ve Beytü’l-mâl-i âmme ve hâssa emîni olan fahrü’l-eşbâh el-Hâc Ahmed Ağa b. Mehmed nâm kimesne tarafından beytü’l-mâl umûrunu rü’yete vekîl-i müsecceli işbu râfi‘u’l-kitâb Osman Efendi b. Mehmed mahzarında üzerine da‘vâ ve takrîr-i kelâm edip ben müteveffât-ı mezbûre İstemihan Hâtun’un sadrî oğlu olup benden gayri vârisi ve terekesine müstehakk-ı âharı olmamağla vekîl-i mezbûr Osman Efendi’den suâl olunup anam müteveffât-ı mezbûrenin terekesinden ber mûceb-i defter-i kassâm-ı askerî müvekkil-i mezbûr el-Hâc Ahmed Ağa’nın bi’l-emâne kabz eylediği bin seksen akçenin alıverilmesi murâdımdır dedikde gıbbe’s-suâl vekîl-i mezbûr Osman Efendi cevâbında fi’l-vâki‘ müvekkilim mûmâ-ileyh el-Hâc Ahmed Ağa’nın müteveffât-ı mezbûrenin terekesinden bin seksen akçeye bi’l-emâne vaz‘-ı yedini ikrâr lâkin müdde‘î-i mezbûrun Ali’den ber-vech-i muharrer müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden olan ve zikr olunan Debbâğhâne mahallesi ahâlîsinden olup mahmiye-i İstanbul’da Karaman kurbünde Subaşı hânında misâfiren sâkin Süleyman Bey b. Mehmed ve mahrûsa-i Galata hâricinde el-Hâc Memi mahallesinde sâkin Topcu Ahmed Beşe b. Mehmed nâm kimesneler li-ecli’ş-şehâde meclis-i şer‘a hâzırân olun isre’l-istişhâd fi’l-hakīka işbu müdde‘î-i mezbûr Ali ânifen zikr olunduğu üzere Varna kasabasında vâki‘ Debbâğhâne mahallesi sâkinelerinden iken bundan akdem sefîne ile İstanbul’a gelirken esnâ-i tarîkde Yedikumlar önünde vefât eden İsmihan Hâtun bt. Mehmed b. Abdullah’ın sadrî oğlu ve vârisidir müteveffât-ı mezbûrenin terekesine müstehak-ı âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mezbûr Ali yine meclis-i mezbûrda vekîl-i mezbûr Osman Efendi mahzarında i‘âde-i kelâm edip anam müteveffât-ı mezbûrenin terekesinden olmak üzere müvekkil-i mezbûr el-Hâc Ahmed Ağa’nın bi’l-emâne makbûzu olan meblağ-ı mezbûr bin seksen akçeyi vekîl-i mezbûr Osman Efendi yedinden tamâmen ahz u kabz eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Recebi’l-ferd li-sene 1137. Şuhûdü’l-hâl: İbrahim b. Muharrem, Halil b. Mustafa, İbrahim b. Mustafa, Yusuf b. Abdullah, Süleyman b. Ahmed, Ali b. Ahmed, Mustafa b. Ahmed, Mehmed b. Ahmed.